Bul týraly О́ńirlik kommýnıkasııalar qyzmeti alańynda ótken onlaın-brıfıngte Qaraǵandy oblysynyń jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy tóleý Muhtar málimdedi.
«О́z isimen aınalysqysy keletinder úshin «Bastaý bıznes» memlekettik baǵdarlamasy bar. Bul baǵdarlama boıynsha kásipkerlik negizderin oqyp-úırený jáne jańa bıznes-ıdeıalardy iske asyrýǵa 583 400 teńge somasynda óteýsiz grant nemese jeńildikti mólsherlemeler boıynsha mıkrokredıt alýǵa bolady. Osy jyldyń 7 aıynda atalǵan joba boıynsha oqýǵa 1 538 adam jiberildi. Baǵdarlama qatysýshylaryna 685 grant jáne 471 shaǵyn nesıe berildi. Shaǵyn nesıeler negizinen mal sharýashylyǵyna, ósimdik sharýashylyǵyna, azyq-túlik pen kıim óndirisine, halyqqa qyzmet kórsetýge, TQS ashýǵa, jolaýshylar men júk tasymalyna berildi», dedi Tóleý Muhtar.
О́ńirde jumyspen qamtýǵa járdemdesý sharalaryn kórsetý úshin «Eńbek», «Jumyspen qamtýdyń jol kartasy» jáne basqa da baǵdarlamalar iske asyrylýda. Bıyl olar 75 myńnan astam adamdy qamtýdy josparlap otyr. Onyń ishinde «Eńbek» baǵdarlamasy boıynsha 41 000 adamdy, JQJK aıasynda – 800 adamdy, basqa baǵdarlamalar boıynsha – 33 700 jumyssyzdy jumysqa ornalastyrý josparlanýda.
«7 aıdyń qorytyndysy boıynsha «Eńbek» baǵdarlamasy boıynsha 25 myńǵa jýyq adam jumyspen qamtý sharalarymen qamtylyp, 21 myńnan astam adam jumysqa ornalastyryldy. Eńbek naryǵynda suranysqa ıe mamandyqtar men daǵdylar boıynsha qysqa merzimdi kásiptik oqytýǵa 930 adam jiberildi. Jastar tájirıbesine 653 adam ornalastyryldy, qoǵamdyq jumystarǵa 5 571 adam tartyldy. «Birinshi jumys orny» baǵdarlamasy boıynsha 80 adam jumysqa ornalasty. Barlyq memlekettik baǵdarlamalar aıasynda 18 myńnan astam jańa jumys orny ashyldy», dedi Tóleý Muhtar.
Halyqtyń áleýmettik osal toptary da memleketten qoldaý alady. Oblys boıynsha ataýly áleýmettik kómek 3 521 otbasyna kórsetildi. Kepildendirilgen áleýmettik paket 1 jastan 6 jasqa deıingi 3 967 balaǵa taǵaıyndaldy. Sonymen qatar, AÁK alýshylarǵa 2 566 dári-dármek qobdıshasy berildi.
«Múgedek adamdardyń ómir súrý sapasyn jaqsartý úshin óńirde áleýmettik qyzmetter portaly quryldy, ol arqyly ońaltý quraldary men qyzmetterin tikeleı jetkizýshilerden óz betinshe satyp alýǵa bolady. Olar arnaıy áleýmettik qyzmetterdi resimdeı alady, ońaltýdyń tehnıkalyq quraldaryna tapsyrys bere alady, ymdaý tili mamanynyń, jeke kómekshiniń, sanatorıı-kýrorttyq emdeýdiń qyzmetterine júgine alady», dep atap ótti spıker.
Memleket tarapynan ońaltýdyń tehnıkalyq quraldary men qyzmetteriniń qunyn óteý tetigi kózdeledi. Portal qosymsha tutynýshy qymbat taýarlar men qyzmetterdi tańdaǵan kezde qosymsha aqy tóleý múmkindigin qarastyrady. 1 tamyzdaǵy jaǵdaı boıynsha portal arqyly 19 335 tehnıkalyq ońaltý quraldary men qyzmetterine tapsyrys berildi, olardyń 14 328-i oryndaldy. Sondaı-aq, osy jyldyń shilde aıynda oblys turǵyndaryna yńǵaıly bolý úshin 1414 nómiri boıynsha biryńǵaı Call-ortalyq ashyldy, onda áleýmettik portal jumysy týraly suraqtarǵa jaýap alýǵa bolady.
