Foto: Vladıslav Semenov, Qazaqstan UOK
– Myrzaǵalı Qulanuly, shákirtińiz Olımpıadanyń qola júldegeri atandy. Kezdesý qandaı deńgeıde ótkenin barlyǵymyz kórdik. Sonda da bul jekpe-jektiń qorytyndysyn ózińizden estisek...
– Biz brıtandyq Jalal Iаfaıdy jaqsy bilemiz. Shákirtim Birjan Jaqyp ekeýi rıngte kezdesken. Olımpıadaǵa barlyǵy jeńis úshin keletini belgili. Sol sebepti qaı jekpe-jekti alsaq ta jeńis biz úshin ońaı kelgen joq. Jartylaı fınaldaǵy kezdesýde Sákenniń qarsylasy á degennen-aq lap qoıa berdi. Mundaıdy kútpegen shákirtim alǵa shabýyldap ketti. Bul onyń qateligi edi. Sonyń saldarynan birneshe soqqyny ótkizip aldy. Ony nokdaýn sanaıtyn-sanamaıtynyn biz sheshpeımiz. Tóreshi nokdaýn degendikten, tóreshiler birinshi raýndty qarsylasyna bergen de bolar. Durys. Al ekinshi jáne úshinshi raýndtyń qalaı órbigenin búkil álem kórdi ǵoı. Jekpe-jekten soń aǵylshyn bapkerleri keshirim surap jatyr. Áriptespiz. Kimniń jeńgenin, kimniń jeńilgenin jaqsy bilemiz ǵoı.
– Ekinshi raýndta Sákendi jigerlendirý úshin ne aıttyńyz?
– Ekinshi raýndtan soń Sákenge bar kúshińdi sal, artynda barsha jurt saǵan senim artyp otyr dep aıttym. Degenmen oǵan taǵar kiná joq. Baryn saldy. Shákirtterim Birjan men Qaıratqa buıyrmaǵan medaldy moınyna taqty. Qanshama jigitterimiz júldesiz qalyp jatqanda, buǵan da shúkirshilik etemiz.
– Eńbek aqtaldy ma sonymen?
– Qansha ter tógildi, eńbektendik. Búgin fınalǵa shyǵyp, Kók týymyzdy jelbiretemiz degen senimmen kelgen edim. О́z basym, jeńetinine de senimdi boldym. Esep – 2:3, jeńis bizge buıyrmady. Negizi, aǵylshyn boksshysy tek birinshi raýndta jeńdi. Ol kezde Sáken bas salyp, aldyǵa júgirip ketti. Al odan keıin óz mánerinde judyryqtasyp, óz oıynyn kórsetti. Sákenniń búgingi jekpe-jegi tamasha boldy. Naǵyz er jigitke tán qaısarlyq boıynan kórindi. Nege deseńiz, ekinshi raýndtan bastap jigitke tán minez kórsetti. Úshinshi raýndta jeńisti julyp aldy. Biraq amal joq, tóreshiler basqasha sheshti.
– Sáken qola júlde úshin aıqasta myqty degen boksshylardan basym túskenin bilemiz. Osy jekpe-jekterdi qysqasha aıtyp bere alasyz ba?
– Sáken birinshi aınalymda Pýerto-Rıko ókili Iаnkel Rıvera Fıgeroamen kezdesip, 4:1 esebimen qarsylasyn tize búktirdi. Al ekinshi kezdesý Sáken úshin ońaı bolmady. Álem chempıonatynyń qola júldegeri, Fransııanyń úmit artyp otyrǵan boksshylarynyń biri. Sol sebepti, eki-úsh kún boıy taktıkalyq jaǵynan daıyndaldyq. Berilgen tapsyrmanyń barlyǵyn oryndap shyqty. Qarsylasy Sákenge qaraǵanda, salmaqty kóp qýatyn jigit. Ony baıqap júrdik. Sondyqtan biz jyldamdyqty údetýge basymdyq berdik. Bul turǵydan bizdiń josparymyz oryndalyp, tóreshiler sheshimimen aıqyn jeńiske jettik. Al shırek fınalda ıspan boksshysymen bolǵan kezdesýde onyń kishigirim qatelikteri boldy. Qolmen jumys istemeı, bir orynda turyp qaldy. Ekinshi raýndtan soń ony jigerlendirý kerektigin túsindim. Olımpıadaǵa ne úshin kelgenin aıttym. Bar kúshimen uryp, qolynan kelgenin aıanbaýyn suradym. Kerek bolsa, tóbeles dedim. Ár adamnyń bokstasý máneri ártúrli, eger qarsylasyń «las» oıyn kórsetse, oǵan da beıimdelý kerek.
– Olımpıadaǵa qandaı maqsatpen kelip edińizder?
– Kezinde Tokıo Olımpıadasynda jalpykomandalyq esepte kósh basynda turyp, shákirtim altyn alady degen maqsat qoıyp edim. О́kinishke qaraı, oryndalmady. Endi maqsatymyzdy Parıjde oryndaý úshin eńbek etemiz.
