«Anyqtamasyz kelgen Qazaqstan Respýblıkasynyń 6 azamatynan alynǵan koronavırýs ınfeksııasyna qarsy PTR-test zertteýi teris nátıje kórsetti. Al byltyrǵy 6 qazannan beri Atyraý oblysyna 56 996 adam, onyń ishinde 8 577 jaıaý júrginshi, 48 419 júrgizýshi keldi. Oblys aýmaǵyna kirýge anyqtamasyz kelgen 355 shetel azamatyna tyıym salyndy. Sondaı-aq Qazaqstannyń 4 757 azamatyna PTR-testileý júrgizildi. Onyń ishinde 54 azamattan (49 júrgizýshi, 5 jolaýshy) COVID-19-dyń belgisi tabyldy», dep habarlady departamenttiń baspasóz qyzmeti.
Karantındik shekteý sharalarynyń kúsheıtilýine baılanysty Atyraý qalasy men aýdandar ákimderiniń ókimimen 64 mobıldi top qurylǵan. Qazir mobıldi toptar karantındik shekteý sharalarynyń saqtalýyna monıtorıng júrgizip keledi. Mobıldi toptar quramynda polısııanyń, «Atameken» UKP óńirlik fılıaly men ákimdikterdiń ókilderi bar. Máselen, bıylǵy 1 qańtar men 29 shilde aralyǵynda 10 976 reıd ótkizilip, 44 777 nysan tekserildi. Mobıldi toptardan quqyq buzýshylyqqa qatysty 620 materıal tústi. Karantın talabyn elemegen shaǵyn jáne orta bıznes nysandaryna, jeke tulǵalarǵa Quqyq buzýshylyq týraly kodekstiń 425-babynyń 1-bóligimen 423 aıyppul salynypty.
Degenmen aıyppulǵa aıylyn jımaıtyndar toı ótkizýdi toqtatar emes. Oblystyq polısııa departamenti baspasóz qyzmetiniń málimetine júginer bolsaq, Isataı aýdanynda 7 mobıldi top músheleri ártúrli is-shara, toı túrindegi basqosý ótkizgen 15 derek tirkelipti. Naqtysyn aıtqanda, «Loto klýb» keńsesi men 14 turǵyn úıde toı-dýman ótkizilgen. Al Qyzylqoǵa aýdanynda 6 is-shara men 4 toı ótkeni anyqtaldy. Atyraý qalasyna taıaý ornalasqan Damby aýyldyq okrýginde 1 tamyzda saǵat 19.00 shamasynda «Adına» meıramhanasynda ótip jatqan úılený toıy toqtatyldy.
Tipti birneshe ret aıyppul tólegen karaoke-bardyń kúzetshisi monıtorıng tobynyń múshesine qol kóterdi. Munaıly shahardaǵy emhananyń eki medbıkesi jalǵan vaksına pasportyn jasaýmen aınalysyp kelgen. Jarǵa jyǵar jalǵan iske bel býǵan medbıkeler polısııa departamenti men oblystyq prokýratýra qyzmetkerleriniń birlesken jedel is-sharasy kezinde ustaldy. Qý qulqyn úshin arany ashylǵan medbıkeler vaksınanyń ár komponentine 50 myń teńge, eki komponent úshin 100 myń teńgeni banktik esepshotyna aýdartyp otyrǵan. Aqshasyn aýdarǵan turǵyndar emhanaǵa kelip, vaksına saldyrmasa da vaksına pasportyn alyp júrgen. Medbıkeniń biri jalǵan aqparatty júıege engizip, ekinshisi vaksına suıyqtyǵyn quıtyrqy áreketpen pasıentke ekpegeni anyqtaldy.
Atyraý oblysy
