Endi Fransııa turǵyndary kafege, meıramhanaǵa kirý úshin jáne alys saparǵa shyǵar aldynda vaksına pasportyn nemese PTR test, antıdenege tekserilý anyqtamasyn usynýy tıis.
Fransýz bıligi bul ereje vaksınasııany tezdetýge jáne koronavırýstyń «tórtinshi tolqynynyń» aldyn alýǵa kómektesedi dep úmittenedi.
Densaýlyq saqtaý mınıstri Olıve Veran fransýz baspasózine bergen suhbatynda: «Jasyl pasport bizge jańa komendanttyq saǵattar men logdaýnnyń aldyn alýǵa kómektesýi kerek», dedi.
O.Veran osyǵan baılanysty erejelerdegi kishigirim ózgeristerdi málimdedi, atap aıtqanda, PTR testi buryn josparlanǵandaı 48 emes, 72 saǵatqa jaramdy.
Elde buryn vaksına pasporty mádenı oryndarǵa, teatr jáne mýzeıge barǵan kezde ǵana suralatyn.
5 tamyzdaǵy jaǵdaı boıynsha fransýz halqynyń 49,7 paıyzy COVID-19 vaksınasynyń eki dozasyn aldy. Alaıda Korsıka men Jerorta teńizi jaǵalaýynda ınfeksııa jıiligi artyp keledi. Sebebi qazir bul aımaqta demalýshylar kóp.
Fransııanyń Úndi muhıty men Karıb teńizinde jaqyn aýmaqtarynda vaksınasııa baıaý júrip jatyr. Sol sebepti atalǵan óńirde jańa shekteýler engizilgen.
Jaqynda júrgizilgen áleýmettik saýalnamalar fransýzdardyń basym kópshiligi vaksına pasportyn qoldaıtynyn kórsetti.
Sońǵy kúnderi prezıdent E.Makron jastar arasynda tanymal TikTok áleýmettik jelisinde el azamattaryn vaksına alýǵa shaqyrdy.
«Bul úlgili azamat bolý máselesi. Eger biz dostarymyzǵa, kórshilerimizge nemese ata-ájelerimizge juqtyrsaq, erkindigimizdiń quny joq. Erkin bolý - jaýapty bolý degen sóz», dedi Fransııa prezıdenti.
