Bul synǵa Qazaqstannyń atynan 25 paralımpıadashy qatysyp, sporttyń 7 túrinen el namysyn qorǵaýǵa attanady.
«Paralımpıada oıyndary qarsańynda «Qazaqstannyń Paralımpıada sportyn qoldaımyz» chellendji bastaldy. Rıo-2016 Paralımpıada oıyndarynan keıin elimizde parasportpen aınalysqysy keletinderdiń sany artty, óńirlerde múgedek adamdarǵa arnalǵan jańa sport mektepteri ashyldy jáne elordada ýltrazamanaýı paralımpıadalyq jattyǵý ortalyǵy salyndy. Onda múmkindigi shekteýli adamdar ózine qolaıly sport túrimen tegin aınalysa alady», dep jazylǵan Ulttyq paralımpıada komıteti Marketıng jáne kommýnıkasııa departamentiniń habarlamasynda.
Komıtet jarııalaǵan chelledjge qatysý úshin paralımpıadashylarǵa qoldaý bildergen mazmundaǵy beıneúndeý túsirip, áleýmettik jelige NPK @kazparalympics resmı akkaýntyn belgileý arqyly myna heshtegtermen salý qajet: #teamkz, #kazparalympics jáne #parateamkz.
Chellendjge birinshi bolyp Nurlan Qoıanbaev, Arýjan Saın, Maqpal Isabekova, Móldir Áýelbekova, Beıbit Qorǵan, Erlan Kókeev, Baqyt Syzdyqova sııaqty tanymal adamdar ún qosqan.
Eske salsaq, 29 shilde kúni QR Prezıdenti Qasym-Jomart Toqaev Qazaqstan Ulttyq paralımpıada qurama komandasynyń múshelerimen kezdesken bolatyn. Memleket basshysy sportshylardyń Táýelsiz Qazaqstan tarıhynda alǵash ret Paralımpıada oıyndaryna 25 joldama utyp, baıraqty básekege úlken qurammen attanyp bara jatqanyn atap ótti.
«Álemdegi júz myńdaǵan sportshynyń arasynan úzdik shyǵyp, osy oıyndarǵa joldama alý ekiniń biriniń qolynan kele bermeıdi. Sizder buǵan tabandylyq pen kásibı daıyndyqtyń arqasynda qol jetkizýge bolatynyn dáleldedińizder. Demek, árbir para sportshymyzdy qazirdiń ózinde jeńimpaz deýge bolady. О́zderińizdi barsha otandasymyz maqtan tutady», degen edi Memleket basshysy.
