«Esirtki jetkizý jáne ótkizý arnasynyń jolyn kesýge baǵyttalǵan jedel-izdestirý is-sharalaryn júrgizý barysynda 37 jastaǵy er adamnan salmaǵy eki kılogramm «gashısh» esirtkisi tabyldy. Odan ári turǵylyqty jeri boıynsha tintý barysynda arnaıy jabdyqtalǵan ıtter úıshiginde salmaǵy 34 kılogramnan asatyn «gashısh» salynǵan eki polıetılen paket tárkilendi», dep habarlady elordalyq polısııadan.
Nátıjesinde, atalǵan esirtki túriniń 36,3 kılogramy tárkilendi, bul 73 myńnan astam bir rettik dozany quraıdy.
«QR QK 297-baby 3-bóligi (Esirtki zattaryn ótkizý maqsatynda zańsyz satyp alý, saqtaý, tasymaldaý) boıynsha qylmystyq is qozǵaldy. Bul bap qylmyskerdiń múlkin tárkilep, 10 jyldan 15 jylǵa deıingi merzimge bas bostandyǵynan aıyrý jazasyn kózdeıdi. Ustalǵan azamat ÝUI-ǵa qamaýǵa alynyp, tergeý amaldary júrgizilýde», dep naqtylady qalalyq PD baspasóz qyzmeti.
