Bıyl «Bilim berý» jáne «Densaýlyq saqtaý», sonymen qatar aqparattyq-kommýnıkasııalyq tehnologııalar, quqyq, dızaın, menedjment bilim berý baǵyttary suranysqa ıe. Grantqa úmitkerler arasynda 8 myńnan astam «Altyn belgi» ıegeri, 800-den astam halyqaralyq jáne respýblıkalyq olımpıada jeńimpazy, sondaı-aq respýblıkalyq jáne halyqaralyq sporttyq jarystardyń 520 jeńimpazy bar. Upaılar teń bolǵan jaǵdaıda, olardyń basym quqyǵy boldy.
«Bilim jáne ǵylym mınıstrligi memlekettik bilim granttary ıegerleriniń sapalyq quramyn jaqsartý maqsatynda jumys júrgizip jatyr. Biz bolashaqta pedagog bolǵysy keletin talapkerlerge qoıylatyn talapty kúsheıtip jatyrmyz. Ulttyq biryńǵaı testileýde pedagogıkalyq baǵyttar boıynsha ótý baly 75-ke deıin kóterildi. Bul rette biz oń úrdisti baıqap otyrmyz — pedagog bolýǵa nıet bildirgen túlekterdiń sany artyp keledi», dep atap ótti QR Bilim jáne ǵylym vıse-mınıstri Qýanysh Erǵalıev.
Esterińizge sala keteıik, bıyl Memleket basshysynyń tapsyrmasyna sáıkes alǵash ret áleýmettik osal sanattaǵy balalarǵa kvotalar bólindi. Iаǵnı, kópbalaly nemese tolyq emes otbasylardan shyqqan balalar, sondaı-aq erekshe bilim berý qajettiligi bar bala tárbıelep otyrǵan otbasynan shyqqan túlek grant alýda basym múmkindikke ıe boldy.
«Sonymen qatar tıisti kvota boıynsha granttardy jetim balalar men etnıkalyq dıaspora ókilderi aldy. Osylaısha, azamattardyń áleýmettik osal sanatyndaǵy talapkerler bilim berý granttaryn berý kezinde artyqshylyqqa ıe boldy. Máselen, pedagogıkalyq mamandyqtarǵa 11 myńǵa jýyq bilim granty bólinse, onyń myńnan astamyna jeńildigi bar sanattaǵy azamattar ıe boldy», dedi QR Bilim jáne ǵylym vıse-mınıstri.
Aıta keteıik, Prezıdenttiń tapsyrmasy boıynsha granttyń jalpy sany 5 myńǵa artty. Iаǵnı, ótken jyly 51 myń grant bólinse, bıyl 56 myńǵa deıin ulǵaıdy. Endigi kezekte memlekettik bilim granty ıegerleri oqýǵa qabyldaný úshin joǵary oqý ornyna 25 tamyzǵa deıin qujat tapsyrýy tıis.
Memlekettik grant taǵaıyndaý máselesine qatysty barlyq suraqpen tómendegi nómirlerge habarlasýǵa bolady:
87172 695096
87172 695280
87172 695287
87172 695292
87172 695071
87172 742284
87172 742525
8 7172 741739
