Tipti ózara senimsizdik adam men adamnyń ǵana emes, álemdik qoǵamdastyq pen jekelegen elderdiń, memleket pen adamdardyń arasyndaǵy alaýyzdyqqa alyp kelýde. Aqparattar aǵynyn baqqanda, ortaq mámileniń joqtyǵy men jappaı ymyrasyzdyqty anyq baıqaısyz. Kelissózder ústeli kóbine bos turatyn ahýal qalyptasty.
Adamdar árdaıym álemdi ózgertýge umtylatyn. Mine, kózimiz kórgendeı, keıingi eki jylda dúnıe shyn máninde ózgerdi. Biraq bul ózgeristerge biz, adamdar, daıyn bolmaı shyqtyq.
Dúnıe jurty 18 tamyzdy – Til tabysý kúni, ortaq til kúni retinde atap ótip keledi. Álemde, árıne, ortaq til joq, jappaı taraǵany da, jasandysy da ol mindetti arqalaı almaıdy. Adam – sansyz kóp, san alýan. Sol kóp jurtta múdde de, maqsat ta ortaq bolmaıdy. Biraq uqsas arman men úmit bolady emes pe?! Ásirese ol beıbitshilik pen tynyshtyqqa, sábıdiń uıqysy men kúlkisine, adamzat balasynyń bolashaq taǵdyryna qatysty bolǵanda tipti uqsasyp, uıqasyp ketpeı me?!. Al osyǵan qaýip tóngende qorqynysh pen úreı de ortaq bolady ǵoı.
Mine, bul ataýly kúnniń negizgi maǵynasy da osynda, tiliń basqa bolsa da, tilegiń bir, diniń basqa bolsa da, júregiń bir bolmaqta jatqandaı.
