Bul jobaǵa bastamashy bolǵan Ýrbanıstıka ortalyǵynyń mamandary iske kirispes buryn músin avtorlarynyń jazbasha kelisimin aldy. Tipti mozaıka avtorlarynyń biri Vıktor Arenttiń ózi de bul jumysqa atsalysty.
Uzaq ýaqyttan beri turǵan bul músinder ábden toza bastaǵan-tuǵyn: jabynnyń bútindigi buzylyp, smalta boıymen jaryqtar paıda boldy, tuǵyrlary moryp, bloktardyń arajiginen shóp ósip shyǵa bastaǵan edi.
Sheberlerdiń músinderdi qalpyna keltirgeni óz aldyna, sonymen birge mozaıka ornalasqan aýmaq ta retke keltirildi. Qalalyq ákimdiktiń kómegimen shamdar ornatylyp, qyrly tas tóseldi, jaıaý joldar salyndy. Sondaı-aq mozaıkalyq músinder mańyna gúlzar jasalyp, kóshetter otyrǵyzyldy, kógal shóp egildi. Avtomatty sýarý júıesi de ornatyldy.
Qaraǵandy Ýrbanıstıka ortalyǵynyń sýretshisi jáne jetekshisi Shyńǵys Qasymov bul mozaıkalyq músinderdiń qaraǵandylyqtar úshin erekshe mura, estelik retinde óte mańyzdy jádiger ekenin aıtady.
– Qaraǵandy – monýmentaldy ónerdiń sany men sapasy jaǵynan eń baı oblystyń biri. Taıaý arada Ýrbanıstıka ortalyǵynyń saıtynda oblystyń barlyq mozaıkasy boıynsha qysqasha sıpattamasy bar karta ornalastyrylatyn bolady, – deıdi ol.
Ortalyq saıabaqtyń ajaryn asha túsken árbir mozaıkalyq músinniń janynda QR-kody bar aqparattyq taqtaıshalar ornatyldy.
QARAǴANDY
