«Qazaqtyń mańdaıyna bitken eń daryndy tulǵalarymyzdyń birisiz. Bárimiz sizdi maqtan tutamyz. Qazaqstanda da, shet memleketterde de ózińizdi bilmeıtin adam joq. Álemdik deńgeıde sizdiń ónerińizdi bári joǵary baǵalaıdy. Pedagog retinde de, qoǵamdyq jumystarda da belsendisiz. Táýelsiz elimizdiń damýyna sińirgen eńbegińiz orasan. Osy qyzmetińizdi eskere otyryp, Otandyq mádenıetti damytý men mýzyka ónerin dáripteýdegi aıryqsha eńbegińiz úshin joǵary dárejeli erekshelik belgisi – «Qazaqstannyń Eńbek Eri» ataǵyn berý týraly sheshim qabyldandy. Men ony laıyqty sheshim dep esepteımin», dedi Qazaqstan Prezıdenti.
Álibek Dinishev Memleket basshysyna eńbegin baǵalap, qurmet kórsetkeni úshin alǵysyn bildirdi.
«Meniń shyǵarmashylyǵymdy baǵalap, kórsetip jatqan qurmetińiz úshin alǵys aıtamyn. О́zińiz aıtqandaı elimizdiń de, shet memleketterdiń de sahnasynda óner kórsetip kele jatqanyma 45 jyl bolǵan eken. 70 jas mereıtoıyma joǵary dárejeli «Qazaqstannyń Eńbek Eri» ataǵyn berip jatyrsyzdar. Sheksiz rızashylyǵymdy bildiremin», dedi Álibek Dinishev.
Qasym-Jomart Toqaev qabyldaý sońynda Álibek Dinishevke densaýlyq, kásibı jáne qoǵamdyq jumysyna tabys tiledi.
