Tehnıka ǵylymdarynyń kandıdaty Saıat Jansúgirov 1930 jyly 21 aqpanda dúnıege kelgen. Máskeýde bilim alyp, zeınetkerlikke shyqqansha taý-ken ınjeneri bolyp jumys istedi. Qazaq SSR Ǵylymdar akademııasynyń taý-ken isi ınstıtýtynda biraz ýaqyt eńbek etti.
Ilııas Jansúgirovtyń tuńǵyshy 8 jasynda ákesinen aıyrylǵan, anasy Fatıma da kóp uzamaı kóz jumady.
«Jastaıymnan aǵaıyn-týys, úıge keletin adamdardyń bári ákeńe uqsaısyń dep aıtatyn. Mektepte, keıin Máskeýdegi Taý-ken ýnıversıtetinde oryssha oqydym. Jumysta da óńsheń orystardyń arasynda boldym. Alaıda, tilimdi saqtadym. Qazir ákem týraly maqala jazyp turamyn. Ákemniń óz kindiginen taraǵan urpaqtaryna keletin bolsaq, úshinshi áıeli Fatıma Tórebaevadan men jáne kishkentaı kezinde shetinep ketken Saıra esimdi qaryndasym ekeýmiz. Al, tórtinshi áıeli Fatıma Ǵabıtovadan Úmit, Ilfa esimdi eki qyz, Bolat esimdi bir uly bar. Ilfa men Bolat bul kúnde baqılyq boldy. О́zime kelsem, Jamal, Rızeda esimdi eki qyzym bar. Jamal Máskeýde, Rızeda Horvatııada turady», degen ol suhbattarynyń birinde.
