Kórmeni Qazaqstan Respýblıkasy Tuńǵysh Prezıdenti - Elbasy kitaphanasy Shyǵys Qazaqstan oblysy men Semeı qalasy ákimdikteriniń qoldaýymen uıymdastyrdy.
Elbasy kitaphanasynyń dırektory Baqytjan Temirbolat quttyqtaý sózinde polıgonnyń jabylýy men Qazaqstan Táýelsizdiginiń 30 jyldyǵymen tuspa-tus kelgenin atap ótti.
«Bıyl Semeı ıadrolyq polıgonynyń jabylǵanyna 30 jyl tolyp otyr. Tarıhı oqıǵanyń qazaqstandyqtar úshin orny erekshe. Alashordanyń astanasy, Abaı, Shákárim, Muhtar Áýezov syndy abyroıly azamattardyń qasıetti ólkesi atanǵan Semeı jeri jıyrmasynshy ǵasyrda jan túrshigerlik synaqqa ushyrap, KSRO-nyń negizgi ıadrolyq polıgonyna aınaldy. 40 jyldyń ishinde Semeı dalasynda 456 ıadrolyq jarylys júrgizildi. Polıgonnyń jerimizge, halqymyzǵa tıgizgen zııany orasan zor. 1991 jyly QR Tuńǵysh Prezıdenti N.Áe Nazarbaevtyń jarlyǵymen polıgon jabyldy. Tarıhı sát semeılikter men jalpy qazaqstandyqtarǵa ǵana emes, búkil adamzat úshin mańyzdy oqıǵaǵa aınaldy. El Prezıdenti Qasym-Jomart Toqaev ıadrolyq qarýǵa qarsy bastamalardy ilgeriletý jáne halyqaralyq qaýipsizdikti nyǵaıtý boıynsha Elbasynyń saıasatyn jalǵastyrdy. Memleket basshysy 2019 jyldyń qyrkúıeginde BUU Bas assambleıasynyń 74-sessııasynda ıadrolyq qarýdan azat álemge qol jetkizý Qazaqstannyń negizgi basymdyǵy bolyp qala beretinin atap ótti», dedi ol.
Sonymen qatar Abaı atyndaǵy Shyǵys Qazaqstan oblystyq ámbebap kitaphanasynyń dırektory Gúlnar Jigitbaevaǵa Elbasy kitaphanasy qorynyń basylymdaryn tartý etti.
Ekspozısııa Qazaqstan tarıhynan syr shertetin Elbasy kitaphanasy qoryndaǵy arhıvtik materıaldar, jádigerlermen men kitaptar keshenin kópshilik nazaryna usynady. QR Tuńǵysh Prezıdenti – Elbasy N.Á. Nazarbaevtyń ıadrolyq qarýsyzdaný jáne ıadrolyq qarýdy taratpaý isine qosqan úlesi úshin berilgen halyqaralyq marapattary kórmede erekshe oryn alady.
Kórme tusaýkeserinde oblys ákiminiń orynbasary Azamat Mýhamedchınov Qazaqstannyń adamzatty ıadrolyq qarýdan azat etýge jáne jappaı qyryp-joıatyn qarýdy taratpaýǵa baǵyttalǵan saıasatyn halyqaralyq qoǵamdastyq moıyndaıtynyn aıtty.
«Nátıjesinde bul saladaǵy elimizdiń jahandyq kóshbasshylyǵyn nyǵaıa tústi. BUU minberinen, halyqaralyq forýmdardan, sondaı-aq ıadrolyq derjava basshylarymen jeke kezdesýlerden osy ustanymdardy túbegeıli jáne dáıekti túrde qorǵaǵan elimizdiń Tuńǵysh Prezıdenti, Elbasy Nursultan Ábishuly Nazarbaevtyń róli erekshe», dedi ol.
Semeıden keıin Nevada, Novaıa Zemlıa, Lobnor, Mýrýroa qalalaryndaǵy polıgondar jabyldy. Sondyqtan BUU Bas assambleıasy 29 tamyzdy Iаdrolyq synaqtarǵa qarsy halyqaralyq kúres kúni dep jarııalady.
«Qazirgi geosaıası turaqsyzdyqta, elder qarý-jaraqpen sanasyp, ıadrolyq qarýmen jarysyp jatqan tusta Qazaqstannyń ıadrolyq qarýǵa tyıym salý ıdeıasynyń avtory ári jahandyq bitimger retinde róli erekshe mańyzdy. Osy oraıda Vashıngtonda 2016 jylǵy 31 naýryzda N.Á. Nazarbaev usynǵan «Manıfest. Álem. XXI ǵasyr» atty Qazaqstannyń Ulttyq baıandamasy ózekti. Qujat Bas assambleıa men BUU Qaýipsizdik keńesiniń resmı qujaty mártebesin aldy», dep jazady Elbasynyń kitaphanasy.
«Mańyzdy sheshimder kezeńi» kórmesi úsh bólimnen turady:
1. «Semeı qasireti» bólimi kórermenderdiń nazaryna Semeı ıadrolyq synaq polıgonynyń qyzmetimen baılanysty jaǵdaıdyń barlyq qaıǵy-qasiretine toly materıaldardy usynady;
2. «Elbasynyń ıadrolyq qarýsyz álem jolyndaǵy bastamalary» bóliminde kitaphana, arhıv, mýzeı qory materıaldarynyń negizinde Elbasynyń ıadrolyq qaterden azat álemdi nyǵaıtýǵa baǵyttalǵan bastamalary kórsetilgen;
3. «Beıbit atomǵa quqyq» bólimi Elbasynyń atomdy beıbit maqsatta paıdalaný ıdeıasyn nasıhattaý jáne ıadrolyq tehnologııalardy taratýǵa qatysty qaýipsizdik sharalaryn qamtamasyz etý jónindegi qyzmeti týraly arhıv materıaldarynyń, mýzeı eksponattarynyń jáne kitaptardyń keshenin bildiredi.
«Mańyzdy sheshimder kezeńi» kórmesi 2021 jyldyń 27 qyrkúıegine deıin jalǵasady. Onyń materıaldarymen Elbasy kitaphanasy resmı saıtynyń «Kórmeler» bóliminde tanysýǵa bolady.
