«Zelenyı bor aýyldyq mektebinde 500-den astam oqýshy bilim alady. Birinshi kezekte, pedagog-áriptesterimmen áńgimelestim. Bıylǵy oqý formaty týraly áńgime barysynda muǵalimder dástúrli oflaın formatyn qoldaıtyndyqtaryn atap ótti. Balalar mektepke oralǵan kezde pedagogter eń aldymen bilim berý dıagnostıkasyn júrgizý, oqý baǵdarlamalaryn beıimdeý jáne bilimdegi olqylyqtardy qalpyna keltirý boıynsha sharalar qabyldaýdy josparlap otyr.
Sondaı-aq áriptesterimniń oqýlyq, baǵalaý júıesi, sıfrlyq platformalar jáne bilim berý júıesine engizilip jatqan jańashyldyqtar týraly pikirlerin tyńdadym. Muǵalimderdiń 45 mınýttyq sabaqqa qaıta oralýymyzdy oń baǵalaǵany qýantady.
Pedagogterge eńbekaqy tóleý máselesi de mańyzdy. Bıologııa pániniń muǵalimi 430 myń teńgeden astam eńbekaqy alatynyn, sondaı-aq pedagog mártebesin arttyrý jónindegi sharalardyń tıimdiligin baıqap otyrǵanyn tilge tıek etti.
О́ńirdiń bilim basqarmasynyń basshysyna bıylǵy oqý úderisin uıymdastyrý, balalardyń qaýipsizdigin qamtamasyz etý, sanıtarlyq talaptarǵa, ınfraqurylymǵa qatysty máselelerge nazar aýdarý qajet ekendigin aıtyp jetkizdim.
Balalardy tasymaldaý máselesi de mańyzdy bolyp qalady. Buǵan deıin biz oqýshylardy tasymaldaý týraly talaptarǵa ózgerister engizdik. Kólik sapa máselesinen bólek, qaýipsizdik beldikterimen, balalardy salonda qaldyrýdy boldyrmaý júıesimen jabdyqtalýy kerek. Sondaı-aq mektep avtobýstarynda balalardy arnaıy qyzmetker ertip júrýi tıis», dep jazdy mınıstr.
Sonymen qatar Ashat Aımaǵambetov bilim berý salasy úshin kadrlar daıarlaıtyn eki kolledj – Kókshetaý pedagogıkalyq kolledji men Shýchınsk qalasyndaǵy joǵary pedagogıkalyq kolledjdiń jumysymen tanysty. Bul kolledjderde barlyǵy eki myńǵa jýyq stýdent bilim alady.
«Qyzmetkerlermen kezdesip, mamandar daıarlaý barysyndaǵy problemalyq máselelerdi talqyladyq. Sondaı-aq stýdenttermen áńgimelestik. Bilim alýshylardyń basym bóligi oqýyn aıaqtaǵannan keıin pedagogıkalyq mamandyq boıynsha joǵary oqý oryndaryna túsýdi josparlap otyr.
Sh. Ýálıhanov atyndaǵy Kókshetaý ýnıversıtetine de bardym. Ulttyq biliktilik testileýiniń qorytyndysy boıynsha atalǵan joǵary oqý ornynyń túlekteri elimiz boıynsha 4-shi orynda, bul – jaqsy kórsetkish. Joǵary oqý ornynyń oqytýshylary oqytý prosesin jaqsartý boıynsha óz usynystaryn bildirdi. Oqytýshylardyń suraqtaryna jaýap bere otyryp, óńirlik ýnıversıtet úshin eń bastysy álemdik reıtıngterge qatysý emes, suranysqa sáıkes bolyp, óńirdi sapaly kadrlarmen qamtamasyz etý áldeqaıda mańyzdyraq ekenin erekshe atap óttim. Belsendi stýdentterdiń suraqtaryna da jaýap berdim. О́z kezeginde stýdentter dástúrli oqytý formatyna oralý týraly jańalyqty qýana qarsy alǵandaryn aıtyp jetkizdi», dep jazdy mınıstr.
