«Men taǵy bir mańyzdy máselege arnaıy toqtalǵym keledi. Dúnıejúzi ónerkásip pen ekonomıkany ekologııalyq tazartýǵa bet burdy. Qazir bul – ánsheıin sóz emes, salyq, baj jáne tehnıkalyq retteý sharalary sııaqty naqty sheshimder. Biz odan tys qala almaımyz. Mundaı sheshimder eksport, ınvestısııa jáne tehnologııa transferti arqyly elimizge tikeleı áser etedi. Shyn máninde, bul – Qazaqstannyń ornyqty damýy máselesi. Sondyqtan men 2060 jylǵa qaraı kómirteginen arylý mindetin júktep otyrmyn», dedi Prezıdent.
Memleket basshysynyń aıtýynsha, ósim sapaly bolý úshin qýat kózderi qajet.
«Qazaqstanda 2030 jylǵa qaraı elektr qýatynyń tapshylyǵy paıda bolady. Álemdik tájirıbege qarasaq, munyń eń ońtaıly sheshimi – beıbit atom. Bul – kúrdeli másele. Sondyqtan qaýesetke senip, emosııaǵa berilmeı, ony barynsha tıimdi sheshýimiz kerek. Úkimet pen «Samuryq-Qazyna» bir jyldyń ishinde Qazaqstanda qaýipsiz ári ekologııalyq taza atom energetıkasyn damytý múmkindigin zertteýge tıis», dedi Memleket basshysy.
Sonymen qatar ınjenerlik salany damytý jáne atom salasyndaǵy bilikti ınjener mamandardyń jańa býynyn qalyptastyrý týraly da sóz boldy. Prezıdent «jasyl» sýtegi óndirisi, jalpy sýtegi energetıkasynyń bolashaǵy zor ekenin atap ótti. Úkimetke osy másele boıynsha da usynys ázirleýdi tapsyrdy.
