Foto: QR Saýda jáne ıntegrasııa mınıstrligi
Talqylaýdy uıymdastyrý bastamasyn qazaqstandyq tarap kóterdi. Is-sharaǵa Eýrazııalyq ekonomıkalyq odaqqa (EAEO) múshe memleketterdiń memlekettik organdarynyń ókilderi, bıznes qaýymdastyqtar men salalyq birlestikter qatysty. Jalpy jıynǵa ekonomıkanyń túrli salalarynyń 100-den astam ókili qatysty.
Keńes barysynda Reseı Federasııasynyń Federaldyq salyq qyzmeti men Federaldyq keden qyzmetiniń ókilderi jańa júıeni engizý jáne qoldaný tártibi jóninde túsindirý jumystaryn júrgizip, Reseı aýmaǵyna taýar jetkizýge qatysty praktıkalyq máseleler boıynsha qatysýshylardyń suraqtaryna jaýap berdi.
TJAR — EAEO elderinen Reseı Federasııasyna taýar tasymaldaý kezinde qoldanylatyn taýar jetkizilimin aldyn ala rastaýdyń ulttyq júıesi. Júıe aıasynda jetkizilimdi aldyn ala tirkeý, taýardyń aldaǵy jetkizilimi týraly qujatty (DOPP) rásimdeý, janama salyqtar boıynsha kepildik tólem engizý, sondaı-aq júıede qajetti málimetterdiń tirkelgenin rastaıtyn QR-kod alý kózdelgen.
TJAR júıesi Reseı Federasııasynyń 2026 jylǵy 17 sáýirdegi №101-FZ «Taýar jetkizilimin aldyn ala rastaýdyń ulttyq júıesi týraly» federaldyq zańy jáne Reseıdiń salyq zańnamasyna engizilgen tıisti ózgerister negizinde engizildi. 2026 jyldyń 1 sáýirinen bastap júıe pılottyq rejımde jumys istep keledi, al 2026 jyldyń 1 maýsymnan bastap ony mindetti túrde qoldaný josparlanǵan.
Reseı tarapynyń málimetinshe, atalǵan júıeni engizýdiń negizgi maqsaty — taýar aınalymynyń ashyqtyǵyn arttyrý, janama salyqtardyń tolyq ári ýaqytyly tólenýin qamtamasyz etý jáne taýar qozǵalysyn barlyq kezeńde tıimdi qadaǵalaý. Sonymen qatar baqylaý rásimderiniń negizgi bóligi shekaradan ótpeı turyp júzege asyrylatyn bolady.
Talqylaý barysynda bıznes ókilderi júıede tirkelý tártibi, qujattardy rásimdeý merzimderi, kepildik tólemderdi qoldaný erekshelikteri, sondaı-aq jańa talaptardyń logıstıka men jetkizý merzimderine yqpaly jóninde birqatar suraq kóterdi. Qatysýshylarǵa barlyq máseleler boıynsha tıisti túsiniktemeler berildi.
Sonymen qatar Reseı Federasııasynyń Federaldyq keden qyzmeti jańa talaptardy kezeń-kezeńimen jáne barynsha jeńildetilgen tártipte engizý kózdelip otyrǵanyn atap ótti. Atap aıtqanda, júıeni engizý prosesin súıemeldeý úshin Qazaqstan–Reseı baǵyty boıynsha 30 ótkizý beketinde, sondaı-aq Belarýs–Reseı shekarasyndaǵy 11 ýchaskede mobıldi toptar qurylyp, olar syrtqy ekonomıkalyq qyzmetke qatysýshylarǵa konsýltasııalyq jáne praktıkalyq qoldaý kórsetetin bolady.
Qazaqstan men Reseı arasyndaǵy ózara saýda kóleminiń aýqymdylyǵyn eskersek, TJAR júıesiniń jumysy naryq qatysýshylarynyń keń aýqymy úshin mańyzdy. 2025 jyldyń qorytyndysy boıynsha Qazaqstannyń Reseıge eksporty shamamen 8,1 mlrd AQSh dollaryn qurady. Jetkizilimderdiń basym bóligi avtomobıl kóligi arqyly júzege asyrylady, sondyqtan jańa júıeniń talaptary osy tasymal túrine tikeleı áser etedi.
Keńes qorytyndysynda qatysýshylar EAEO aıasyndaǵy ózara saýdanyń jańa talaptaryna syrtqy ekonomıkalyq qyzmetke qatysýshylardyń der kezinde beıimdelýin qamtamasyz etý úshin memlekettik organdar men bıznes qaýymdastyq arasyndaǵy ashyq ári turaqty dıalogty jalǵastyrýdyń mańyzdylyǵyn atap ótti.
