Qurmetti otandastar!
Qasıetti Qurban aıt merekesi qutty bolsyn!
Halqymyzdyń rýhanı ómirinde erekshe oryn alatyn bul meıramdy búkil musylman qaýymy qadir tutady. Osy kıeli merekede rýhanı kemeldenýge jol ashatyn meıirimdilik pen qaıyrymdylyq, ózara qurmet pen senim, janashyrlyq pen tileýlestik qasıetteri keńinen dáripteledi.
Qurban aıt kúnderi azamattarymyz ózgege qol ushyn berý, úlkenge qurmet, kishige izet kórsetý jáne el bolashaǵy úshin ortaq jaýapkershilikti seziný aıryqsha mańyzdy ekenin uǵyna túsedi. Bul – ádildik pen adamgershilikti, oı men sana tazalyǵyn arqaý etken ıslam iliminiń ulaǵatyn durys túsinip, taǵylymyn tereńirek tanýǵa zor yqpal etetin erekshe kezeń.
Túptep kelgende, bizdiń asyl dinimiz de, elimizdegi basqa dástúrli dinder de halqymyzdyń rýhanı damýyna, urpaqtar arasyndaǵy sabaqtastyq pen qoǵamdaǵy yntymaq-birliktiń artýyna negiz bolyp otyr.
Bárimiz úshin elimizdiń Egemendigi men Táýelsizdiginen bıik eshnárse joq. Konstıtýsııa – halqymyzdyń bolmys-bitiminiń aınasy, ulttyq biregeıligimizdiń ózegi. Sondyqtan el tutastyǵyn kúsheıtý, etnosaralyq jáne konfessııaaralyq kelisimdi nyǵaıtý memleket saıasatynyń asa mańyzdy baǵyty, konstıtýsııalyq mindeti sanalady.
El ishindegi turaqtylyq pen tynyshtyqty kózdiń qarashyǵyndaı saqtaý – árbir otanshyl azamattyń perzenttik paryzy. Bul – qazirgideı almaǵaıyp zamanda memleketimizdi odan ári kórkeıtip, Ádiletti jáne Ozyq Qazaqstandy qurýdyń birden-bir sharty.
Biz aldaǵy ýaqytta halqymyzdyń yrysty yntymaǵy men jasampaz rýhynyń arqasynda bıik belesterdi baǵyndyra beremiz. Men buǵan kámil senemin.
Barshańyzǵa zor densaýlyq pen baq-bereke tileımin!
Qurban aıt qabyl bolsyn!
