Bıylǵy Joldaý – óziniń máni men mazmuny jaǵynan memlekettik organdar, bıznes jáne azamattyq qoǵam ınstıtýttary úshin aldaǵy kezeńge arnalǵan is-qımyldardyń tutas strategııasyn aıqyndaıtyn aıryqsha qujat.
Prezıdenttiń 2021 jylǵy Qazaqstan halqyna Joldaýy Memleket basshysynyń burynǵy Joldaýlarynda aıtqan tapsyrmalarynyń qısyndy jalǵasy, sondaı-aq olardyń tabysty júzege asyrylǵanynyń nátıjesi ekenin atap ótý qajet.
Joldaý memlekettiń pandemııadan keıin eldi ekonomıkalyq damytýdyń oılastyrylǵan baǵdarlamasy bar ekenin kórsetti, ol 2025 jylǵa deıingi damýdyń Jol kartasynda kórinis tabatyn bolady.
Memleket basshysy taıaýdaǵy onjyldyqtyń kúrdeli bolatynyn ashyq aıtty, sonymen birge aldaǵy mindetterdi sheshý jónindegi memlekettik áleýmettik-ekonomıkalyq saıasattyń uzaq merzimdi jáne qysqa merzimdi basymdyqtaryn belgiledi.
Prezıdenttiń bizdiń elimizdiń árbir azamatyna tikeleı qatysy bar, ár qazaqstandyqtyń múddesine sózsiz áser etetin mańyzdy tapsyrmalary der kezinde aıtylyp otyr.
Olardyń qatarynda, Joldaýdyń ekonomıkalyq blogyndaǵy – memlekettik qarjyny basqarý jáne Ulttyq qordy damytý tujyrymdamasy, «Qarapaıym zattar ekonomıkasy» jáne «Bıznestiń jol kartasy» baǵdarlamalaryn uzartý, sıfrly úkimettiń jańa arhıtektýrasy qazaqstandyqtardyń ómir súrý sapasyn arttyrýǵa baǵyttalǵan.
Kóshi-qon saıasatynyń, qonys aýdarýshylardy yntalandyrýdyń jańa tujyrymdamasyn ázirleý halyqty etnodemografııalyq turǵyda utymdy ornalastyrýǵa yqpal etedi, onyń ishinde etnostar jınaqy qonystanǵan jerlerde birqatar áleýmettik-ekonomıkalyq jáne etnosaralyq máselelerdi sheshýge kómektesedi jáne ózara is-qımyldyń kóptegen etnoáleýmettik aspektilerin joıady.
Memlekettiń áleýmettik saıasaty elimizdegi saıası turaqtylyqtyń, birliktiń, ultaralyq tatýlyq pen kelisimniń negizi jáne solaı bolyp qala beredi. Sondyqtan Joldaýdyń áleýmettik blogyn biz osy turǵyda qarastyrýymyz kerek.
Joldaýdyń áleýmettik mindetterin júzege asyrý halyqtyń naqty kiristeriniń ósýine, júzdegen myń azamatymyzdy memlekettiń áleýmettik kepildikter júıesine qosýǵa qýatty sınergııa beredi.
Joldaýdyń basty taqyryptarynyń biri kópetnosty elimizdegi birlik, tatýlyq pen kelisimge arnaldy.
Bul jerde Memleket basshysy barlyq basymdyqtar men ekpinderdi óte aıqyn jáne anyq qoıyp otyr. Joldaýda ultaralyq qatynastardyń úılesimdi damýy qashanda memleket saıasatynyń negizgi baǵyttarynyń biri bolǵany jáne bola beretini atap kórsetildi. «Bul – bekerge aıtylǵan sóz emes. Mundaı ustanymdy qazaqstandyqtardyń basym kópshiligi qoldaıdy», dedi Memleket basshysy.
Prezıdent azamattardyń konstıtýsııalyq quqyqtarynyń kepili retinde zań boıynsha Qazaqstanda bir ǵana memlekettik til bar ekenin, biraq bizdiń zańnamaǵa sáıkes orys tiliniń qoldanylýyna kedergi keltirýge bolmaıtynyn naqty atap ótti. Bul ustanym tek qana Qazaqstan zańnamasyna ǵana emes, sonymen qatar etnosaralyq qatynastardyń úılesimdiligin qamtamasyz etetin, táýelsizdik jyldarynda synnan ótken til saıasatynyń oń tájirıbesine sáıkes keledi.
Memleket basshysy qazaq tilin damytý memlekettik saıasattyń basym baǵyttarynyń biri bolyp qala beretinin aıtty. Bul kózqarasty Qazaqstannyń barlyq azamattary qoldaıtyny sózsiz.
Qazaqstan Prezıdenti bizdiń azamattarymyz úshin kelisim, toleranttylyq – mádenıetter men tilderdiń ózara kirigýine baılanysty ómirdiń shyndyǵy ekenin taǵy da eske saldy.
Ekinshi jaǵynan, Memleket basshysy radıkalızmniń kez kelgen túrine qatań toıtarys beriletinin, Qazaqstannyń memlekettik egemendigi men aýmaqtyq tutastyǵyna eshkimniń qol suǵýyna jol berilmeıtinin basa aıtty.
Árıne, mundaı ustanym el turǵyndarynyń kópshiliginiń múddelerine saı keledi, olar úshin tatýlyq pen kelisim – qaýipsiz ómir súrý, turaqtylyq pen damý múmkindiginiń alǵysharty.
Prezıdenttiń barlyq azamat etnosaralyq jáne konfessııaaralyq qatynastardyń qanshalyqty mańyzdy ekenin túsinýi kerek degen oıynyń mańyzy zor.
Bul turǵyda Joldaýdyń «Halyq birligi jáne júıeli reformalar – el órkendeýiniń berik negizi» degen ataýynyń ózi kóp nárseni ańǵartady.
Joldaýdyń mańyzdy aspektileriniń biri – Táýelsizdiktiń 30 jylynda Qazaqstannyń Tuńǵysh Prezıdenti – Elbasy N.Á.Nazarbaev júzege asyrǵan beıbitshilik, qoǵamdyq kelisim jáne jalpyulttyq birlik saıasatyndaǵy strategııalyq sabaqtastyqty qamtamasyz etýi.
Sonymen qatar Memleket basshysynyń sózi osy saıasattyń irgeli qaǵıdattary men negizderinen aýytqymaı, jańa tarıhı jaǵdaılarda shyǵarmashylyq turǵydan damyp kele jatqanyn aıqyn kórsetti.
Jalpy alǵanda, Memleket basshysy halyqtyń áleýmettik jaǵdaıy men ómir súrý sapasyn jaqsartý boıynsha teńdessiz sharalardy belgiledi. Olarǵa qol jetkizý qoǵamda kelisim men birlik saqtalǵan jaǵdaıda ǵana múmkin bolady.
Sondyqtan Joldaýdyń maqsattary men mindetterine qol jetkizý úshin Qazaqstan halqy Assambleıasynyń jumysy óte mańyzdy ekenin, onyń tatýlyq pen kelisimdi qamtamasyz etýdegi, etnosaralyq qatynastardy úılestirýdegi jáne bizdiń biregeıligimizdi nyǵaıtýdaǵy rólin bıylǵy jyldyń sáýir aıynda osy mańyzdy ınstıtýtty basqarýǵa taǵaıyndalǵan Prezıdent Q.K.Toqaev aıryqsha atap ótti.
Qazaqstan halqy Assambleıasy jańa Joldaýdyń mindetterin tolyq qoldaıdy jáne olardy iske asyrýǵa belsene qatysady.
Barlyq qazaqstandyq mejelengen maqsattarǵa qol jetkizý úshin birigýi tıis. Munyń bári Qazaqstandaǵy tatýlyq pen kelisimniń negizi.
Joldaýdy iske asyrý qoǵamdyq kelisim men jalpyulttyq birliktiń, azamattardyń ál-aýqatyn arttyrýdyń jáne Otanymyzdyń órkendeýiniń berik kepili bolatynyna senimdimin.
Marat ÁZILHANOV,
Qazaqstan halqy Assambleıasy Tóraǵasynyń orynbasary –
Prezıdent Ákimshiligi QHA Hatshylyǵynyń meńgerýshisi
