Joldaýda nazaryńyzdy aýdarǵan qaı másele?

 Naqty ister men usynystar

Memleket basshysynyń halyqqa arnaǵan Joldaýyn tyńdap, óz pikirlerin bildirip jatqan áriptestermen áńgimemiz kóterińki kúıde órbidi. «Halyq birligi jáne júıeli reformalar – el órkendeýiniń berik negizi» atty Joldaýdan túıgen oı kóp.   

Bizdiń kitaphananyń 23 fılıaly, 85 qyzmetkeri qala aýmaǵynda oqyrmandarǵa qyzmet kórsetedi. Iаǵnı qala turǵyn­darynyń pikirine de qanyqpyz. Pande­mııadan keıingi ekonomıkalyq ahýaldy túzetýge baǵyttalǵan naqty ister, aýyl sharýashylyǵyndaǵy ahýal, jaıylymnyń jaıy, bıylǵy qurǵaqshylyqtan alynǵan sabaqtar, bul oraıda asa mańyzdy 120 kanaldyń qaıta jańǵyrtylýy, jańadan 9 sý qoımasynyń salynýy syndy bastamalar men aıqyn maqsattar kópshiliktiń qoldaýyn tabýda. Indetpen kúres bas­ty orynǵa shyqqan búgingideı ýaqytta densaý­lyq saqtaý júıesiniń tıimdili­gin art­tyrý mańyzdy. Áriptesterim, ıaǵnı kitap­hanashylar halqymyzdyń ál-aýqa­tyn arttyrýǵa baǵyttalǵan bastamalar motı­vasııa beretinin, erteńgi kúnge senim­di nyǵaıtyp jigerlendire túsetinin aıtýda.

Núrıla JUMANOVA,

Shymkent qalalyq Abaı atyndaǵy

ortalyqtandyrylǵan kitaphanalar júıesiniń dırektory

Mádenıet – rýhanııattyń dińgegi

Táýelsizdiktiń 30 jyldyǵy qarsańyn­da Memleket basshysy Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty Joldaýyn jarııala­dy. Bul qujat álem memleketterindegi túrli saıası ahýal men elimizdegi bolyp jatqan jaǵdaılardan kóńili kúpti bol­ǵan halyqtyń kókeıine úmit pen senim uıalatqandaı boldy.

Joldaýda halyqtyń ál-aýqaty men turmystyq jaǵdaıyn kóterip, medısına men bilimge tyń serpin beretin máseleler qamtylǵan. Sondaı-aq ózim mádenıet salasynyń qyzmetkeri bolǵandyqtan, osy saladaǵy mamandardyń jalaqysy 2022-2025 jyldar aralyǵynda jyl saıyn 20 paıyzǵa kóteriletinine erekshe qýandym. Mádenıet – rýhanııattyń altyn dińgegi, san ǵasyrlar boıy ulttyq qundylyǵymyz­dy nasıhattaýshy. Má­denıet salasynda qyzmet etetin maman­darǵa qoldaý kórsetý olardyń erkin kósilýine jol ashady. Kitaphanashylar Joldaýdyń halyq arasynda keńinen nasıhattalýyn júzege asyratyn bolamyz.

Gúlnur Altynbekova,

Jambyl oblystyq kózi kórmeıtin jáne álsiz kóretin azamattar kitaphanasy dırektorynyń orynbasary

Eńbegimiz elenetin boldy

Joldaýdan jaqsylyq kútetinimiz ras. Bul joly da Prezıdentimiz Qasym-Jomart Toqaev birqatar mańyzdy máse­leniń basyn ashyp aıtty, Úkimetke tıisti tapsyrmalar berdi.

Árıne, kitaphanada qyzmet etetindik­ten, mádenıet salasy mamandary­­nyń jalaqy­sy jóninde aıtqany bári­miz­di eleń etkizdi. Sebebi kóp jyldan beri kitaphana qabyrǵasynda az ǵana jalaqyǵa jumys istep júr­gen mamandarymyz bar. Kerisinshe, jalaqyny azsynyp, jumystan ketip jatqan bilikti, bilimdi jastarymyz qanshama?! Sondyqtan da bul máselege Prezıdenttiń nazar aýdarǵany shyn qýantty. Ásirese kitaphana, muraǵat, mýzeı qyzmetkerlerine qosymsha tabys tabýǵa múmkindik bolmaıdy. Bolma­ǵan soń da bir jalaqymen jan baǵýǵa májbúr. Alaıda olardyń rýhanııat úshin sińirip júrgen eńbekteri orasan. Memleket basshysy nazar aýdardy, mine. Erteńgi kúni jalaqy kóbeıip, áleýmettik ál-aýqatymyz artyp jatsa, eńbegimizdiń jemisi de eki eseleneri sózsiz. 

Joldaýdy oqyp otyrsaq, halyqtyń ál-aýqatyn arttyrýǵa baǵyt­talǵan ár joly mańyzdy.

Janat Jıenbekova,

Oralhan Bókeı atyndaǵy

О́skemen qalalyq kitaphanasy dırektorynyń orynbasary