Aýyl turǵyndarynyń aıtýynsha, mektep dırektory jazǵy emtıhan kezinde 15 jasar oqýshyǵa sógis aıtyp, oǵan tómen ball qoıǵan. Osydan keıin 9 synyp oqýshysy óz-ózine qol jumsaǵan.
Eýrazııa birinshi arnasyna taratqan aqparat boıynsha, marqum oqýshynyń ákesi tártip saqshylary bul isti úsh aı boıy tekserip jatqanyn aıtady, biraq bul is áli de sońyna jeter emes.
«Tergeý jumystary uzaqqa sozyldy. Al bilim bólimi dırektorǵa 8-shi qyrkúıekte jumysqa oralyp, 25-ine deıin qyzmetin aıaqtaýdy usyndy. Biz oǵan qarsymyz. Ony bilim berý júıesinen múlde shettetý kerek», dedi Kókaral aýylynyń turǵyny Aqylbek Tálipbaev.
Dırektordyń ózi 1-shi qyrkúıek kúni ótkizilgen saltanatty sharaǵa qatysqan joq. Aýdan ákimdiginde onyń emtıhan kezinde jasóspirimnen «shpargalka» taýyp alǵany aıtyldy. Tergeý amaldarynyń júrgizilýi merziminde dırektor qyzmetinen ýaqytsha shettetildi.
«Qazir men osy is boıynsha quqyq qorǵaý organdarynyń sheshimin kútýdemin. Meniń qolymda sheshim bolmaıynsha, dırektordy qyzmetinen bosata almaımyn. Eger onyń kinási anyqtalsa, ol jergilikti turǵyndardan keshirim surap, qyzmetinen ketýge daıyn», dedi Ordabasy aýdandyq adamı áleýetti damytý bóliminiń basshysy Shuǵa Nurabaeva.
Shuǵa Nurabaeva osy mekteptiń dırektory men meńgerýshisine qatysty qatań sógis jarııalap, jumystan shyǵarý týraly usynys kelip túskenin aıtty.
Aýyl turǵyndarynyń bir bóligi dırektor qyzmetin toqtatqanǵa deıin óz balalaryn mektepke jibermeıtinin málimdedi. Alaıda, ata-analar oqýshylardyń merekesin buzbaýdy sheshken.
