Taıaýda qylmystyq-atqarý júıesi organdaryn reformalaýdy iske asyrý aıasynda Ishki ister mınıstriniń orynbasary Murat Baımuqashev, Adam quqyqtary jónindegi ýákil Elvıra Ázimova, Ortalyq Azııadaǵy PRI ókildiginiń jetekshisi Janna Nazarova, «Adam quqyqtary úshin hartııasy» qoǵamdyq qorynyń dırektory Jemis Turmaǵambetova Almaty oblysyndaǵy LA-155/4 áıelder kolonııasyna bardy.
Jumys sapary barysynda sottalǵandardy ustaý, mekeme janynda ornalasqan «Balalar úıindegi» sottalǵan áıelder men olardyń balalaryn medısınalyq qamtamasyz etý, sondaı-aq kolonııa aýmaǵyndaǵy óndiris jumysy tanystyryldy.
Qazirgi ýaqytta «Balalar úıinde» 31 bala tárbıelenýde, olardyń 11-i osy jyly dúnıege kelgen. Munda bóbekter úshin jasalǵan jaǵdaıdyń mektepke deıingi azamattyq mekemelerdegiden esh aıyrmashylyǵy joq. Sábıler men olardyń analary úshin medısınalyq qyzmetkerlerdiń jeke shtaty jumys isteıdi. Budan basqa, birqatar úkimettik emes uıym, onyń ishinde Ortalyq Azııadaǵy PRI ókildigi mekemeniń tehnıkalyq jáne materıaldyq jabdyqtalýyna kómek kórsetip otyrady.
Adam quqyqtary jónindegi ýákildiń aıtýynsha, sottalǵan áıelder úshin oń jańalyqtardyń biri – 3 jasqa tolǵannan keıin balalardyń anasymen birge bolý merziminiń uzartylýy. Bul shara Eýropa elderiniń ozyq tájirıbesi sanalady. Osylaısha, bul ana men balanyń emosııalyq jaǵdaıyna jaǵymdy áser etedi.
IIM basshysynyń orynbasary mekemede qolaıly jaǵdaı jasaýda sottalǵandar úshin jumys oryndaryn kóbeıtý mańyzdy ról atqaratynyn atap ótti.
Jumys saparyna qatysýshylar «Eńbek-Jaýǵashty» RMK fılıalynyń jáne mekeme aýmaǵynda qyzmet etetin jeke kásipkerlerdiń óndiris oryndaryna bardy. Kolonııada jalpy sottalǵandardyń 64%-y jumysqa ornalasqan. Jumystyń negizgi bóligi tigin óndirisine baǵyttalǵan, onda sottalǵandar jylyna orta eseppen 230 myń ónim shyǵarady.
«Qazir sottalǵandar, onyń ishinde áıelder kolonııalary úshin arnaıy nysandy ózgertý týraly usynys qaralýda. Jańa kıim óndirisi mekemeler aýmaǵyndaǵy tigin sehtaryna tapsyrylatyn bolady», dedi M.Baımuqashev.
Sottalǵandardy ustaý jaǵdaıymen tanysqan ókilder jeke máseleler boıynsha qabyldaý ótkizdi. Áıelder qoıǵan suraqtardyń basym bóligi aldaǵy qabyldanatyn raqymshylyqqa, keshirim jasaý múmkindigine, sondaı-aq mekemede qosymsha jumys oryndaryn qurýǵa qatysty boldy.
«Ustaý jaǵdaılaryna bizde shaǵym joq. Munda balalarymyzǵa da qamqorlyq jasaıdy. Bizdiń ákimshilik sottalǵan áıeldermen jumys isteýdiń qyr-syryn túsinedi», deıdi sottalǵandardyń biri.
Qazir mekemede túrli qylmystary úshin 500-den asa áıel jazasyn ótep jatyr. Jumys saparynyń qorytyndysy boıynsha M.Baımuqashev oblystyq vedomstvo basshylyǵyna sottalǵandardyń quqyqtarynyń jáne jazalardy oryndaý salasyndaǵy zańnamanyń múltiksiz saqtalýyn baqylaý baǵytyndaǵy jumysty jalǵastyrýdy tapsyrdy.
