Maqalamyzǵa shyǵarmashylyǵy ózek bolǵan sýretshiniń esimin men alǵash ret belgili qylqalam sheberi Shynybaı Pirimbaevtiń aýzynan estidim. Ol kisi áńgime arasynda Shárdenovtiń eńbekterin joǵary baǵalaıtyndyǵyn aıtqan edi. Sodan meniń de osy sýretshige degen qyzyǵýshylyǵym oıanyp, shyǵarmashylyǵyna zer sala bastadym.
Beıneleý de basqa óner sekildi túrli janrǵa bólinedi. Sonyń ishinde peızaj janry erekshe oryn alady. Jańataı Shárdenov − osy janrdyń damýyna zor úles qosqan tulǵa. Úles qosyp qana qoımaı, ózinshe mektep qalyptastyrǵan dep aıtýǵa bolady. Ony ónertanýshylar óz eńbekterinde jiliktep jazǵan.
Máselen, qylqalam sheberiniń «Alataý bókterinde» (1970), «Aǵash túbindegi shaǵyn úı» (1971), «Kóktóbe» (1972), «Jas qaıyńdar» (1975), «Alma-Arasan saıy», (1978) «Keshki áýen» (1983) sekildi kartınalar osy sózimizge tolyq dálel bolady. Avtor munda adam men tabıǵat arasyndaǵy názik úndestikti boıaý tilimen kórkem jetkize bilgen.
Sondaı-aq «Taýlar», «Kún batý sımfonııasy», «Taýdaǵy kesh», «Ymyrt» atty eńbekterindegi taýlar beınesi asqaqtyǵymen ǵana emes shynaıylyǵymen de baýrap alady. Jalpy sýretshiniń taýlary – basqa sheberler beınelegen taýlarǵa múlde uqsamaıdy. Kórkemdigimen kóz tartady.
О́nertanýshy Aqbota Ilııasjanqyzy Shárdenov týyndylaryndaǵy tústerdiń mańyzyna mán bere kelip: «Onyń «Qysqy peızaj» (1960), «Taýdaǵy jylymyq» (1973), «Bıik taýda» (1972), «Alataý kórinisi» (1970) atty jumystarynda kerisinshe, ashyq, názik tústermen, ıaǵnı aqshyl - kók, kúlgin, qyzǵylt, keıde qystyń yzǵaryn beretin sýyq túster, endi birde, kókshil, ashyq jasyl túster basym bolady. Biraq sýretker qoldanatyn tústerdi naqty aıtý qıyn, óıtkeni, ol bir tústi shyǵarý úshin birneshe tústi keltiredi» dep jazady.
Sonymen qatar sýretshi shyǵarmashylyǵynda aǵashtar men gúlderdiń de orny bólek. Mysaly, «Kúzgi emen», «Qara órik gúldedi», «Qyzyl gúlder», «Qys. Aǵashtar», «Qoshqyl shyrshalar» týyndylary ózgeshe formasymen ǵana emes, túrli-tústi boıaýlarymen de erekshelenedi. Osydan-aq sýretshiniń sezimin, kóńil-kúıin, tabıǵatqa degen kózqarasyn aıqyn ańǵarasyz. Ol kisi tek peızaj ǵana emes, natıýrmort pen portret janrynda da jemisti jumys istep, aıshyqty týyndylar qaldyrdy. Mysaly, jazýshy Saparǵalı Begalın men eki márte Keńes Odaǵynyń Batyry, ataqty ushqysh Talǵat Bıgeldınovtiń portretteri – osy janrdyń qazynasyn baıytqan úzdik dúnıeler sanaldy. Qylqalam sheberi keıbir eńbekterinde beıneleý men ulttyq qol ónerdi sheber úılestirip,tekemet pen syrmaqtardaǵy oıý-órnekterdi týyndylaryna arqaý etken.
Jańataı Shárdenovtiń týyndylary elimizde ǵana emes, shet memleketterde ótken kórmelerge qoıylǵan. Onyń ǵajaıyp qoltańbasy men ónerin amerıkalyq belgili sýretshi R.Kent joǵary baǵalaǵan. Qabyrǵaly qylqalam sheberi 1992 jyly dúnıeden ozdy. Qazir bas shaharda Jańataı Shárdenov atyndaǵy kóshe bar. Peızaj janrynyń jyrshysy atanǵan talantty tulǵanyń óneri ǵana emes, esimi de umytylmaıdy degen osy...
