Esimi el uranyna aınalǵan «Domalaq ana» ómirde bolǵan adam, shyn esimi – Nurılá Mızambekqyzy. Tarıhı derekterde ol kisini VI-VII ǵasyrlar toǵysynda ómir súrgen dep aıtady. On toǵyz jasynda Báıdibek bıge turmysqa shyǵady. Jurtqa danalyǵymen, daralyǵymen jáne erekshe qasıetimen syıly bolǵan áýlıe anadan taraǵan urpaqtarynyń bári el bılegen. Sondyqtan da jańa shyǵarmadaǵy ardaqty ana beınesi aıshyqty kórkemdelip, tereń sıpattalǵan. Bas keıipker – Nurılá partııasyn álemge tanymal opera ánshisi, Memlekettik syılyqtyń laýreaty Maıra Muhamedqyzy jerine jetkize oryndap, asqaq daýysymen ana mahabbatynyń kúshin sezindire bildi. Aıta keteıik, bıylǵy qańtar aıynda talantty tulǵa joǵaryda atalǵan óner ujymyna basshy bolyp kelgeni málim.
Sondaı-aq Báıdibek bı rólindegi Jumabek Qańtarbaevtyń óneri de eshkimdi beıjaı qaldyrmady. Haziret partııasyn Aıbek Qanatbek pen Marat Orazmetov kórkem somdady. Týyndydaǵy Maraý hanym (báıbishe) rólin messo-soprano, Qazaqstannyń eńbek sińirgen qaıratkeri Dına Hamzına oryndasa, Zerip hanymdy (báıbishe) Maıgúl Mıkıjanova kelisti oınady. Sonymen qatar operadaǵy hor jáne balet ártisteriniń úılesimdiligin de aıryqsha aıtýǵa bolady, olar shyǵarmadaǵy kishigirim keıipkerlerdi beıneli jetkizdi.
Jańa premeranyń lıbrettosyn Qazaqstannyń eńbek sińirgen qaıratkeri, daryndy rejısser Ashat Maemırov aq paraqqa túsirse, mýzykasyn belgili kompozıtor Tasqyn Jarmuqamet jazǵan. Sonymen birge Shymkent sımfonııalyq orkestriniń dırıjeri Mádı О́mirzaqtyń eńbegin de erekshe aıtqan jón. Ásirese ulttyq naqyshpen tigilgen kostıýmder men dekorasııalar qoıylym qaharmandaryn ótken dáýirge jaqyndata tústi. Bir sózben aıtqanda, Mıhaıl Pandjavıdze men Qaırat Qulynshaqovtyń rejısserlik sheberligi – kórermenderdi jyly sezimge bóledi.
