«Eń tómengi jalaqy deńgeıin qaıta qaraıtyn kez keldi dep sanaımyn. Bul – bir jaǵynan asa mańyzdy makroındıkator bolsa, ekinshi jaǵynan – árkimge túsinikti kórsetkish. Bizde eń tómengi jalaqy mólsheri 2018 jyldan beri ósken joq. Koronavırýsqa baılanysty álemdik daǵdarys turǵyndardyń tabysyna keri áser etti. Onyń ústine Qazaqstan eń tómengi jalaqy deńgeıi boıynsha TMD-nyń birqatar elinen artta qalyp qoıdy», dedi Prezıdent.
Osylaısha, Memleket basshysy 2022 jyldyń 1 qańtarynan bastap eń tómengi jalaqy mólsherin 42 500 teńgeden 60 myń teńgege deıin kóterý týraly tapsyrma júktedi. Prezıdenttiń aıtýynsha, bul qadam 1 mln-ǵa jýyq otandasymyzdy tikeleı qamtıtyn bolsa, eńbek etip júrgen barlyq azamatqa da janama túrde áser etedi. Men bul sheshimdi tolyq qoldaımyn. Sebebi pandemııa jaǵdaıy túrli salaǵa zııanyn tıgizip, kóptegen adam jumyssyz qalǵan bolatyn. Keıbir otandastarymyzdyń jalaqysy qysqardy. Jyǵylǵanǵa judyryq bolyp, azyq-túlik baǵasy da ósip jatyr. Sondyqtan baǵalaı, túsine bilgen adam úshin 60 myń teńge degenińiz ájeptáýir qarajat. Az dep te, kóp dep te aıtýǵa bolmaıdy.
Árıne, 60 myń teńgeniń ózin azsynatyn adamdar da bolýy múmkin. Olaı oılaý durys emes der edim. Bul kún kórý úshin kóp-kórim qarajat. Memleket úshin eń tómengi jalaqy mólsherin 42 500 teńgeden 60 myń teńgege deıin kóbeıtýdiń ózi jetistik. COVID-19-dyń kesirinen jahandyq ekonomıka jaqsarmaı turǵan kezde, onyń Qazaqstanǵa da áser etetini anyq. Sebebi biz de álemniń bir bólshegimiz. Soǵan qaramastan el Prezıdenti osyndaı nyq qadam jasap otyr. Otandastarymyzdyń ál-aýqatyn jaqsartýdyń jolyn el bolyp túsinip, Memleket basshysynyń tapsyrmasy júıeli oryndalýy úshin qoldaý kórsetýimiz kerek. Sonda ǵana naqty nátıjege qol jetkize alamyz.
Taǵy bir aıta keterligi, eń tómengi jalaqy mólsheri 60 myń teńgege kóbeıgen soń, sony nazarǵa ala otyryp, ózge de jalaqylar joǵarylaıdy dep senemin. Sebebi elimizde eń tómengi jalaqy mólsherinen bólek, ortasha jalaqy, eń joǵary jalaqy taǵy bar. Iаǵnı eń tómengi jalaqy mólsheriniń óskeni basqa da eńbekaqy mólsherine oń áserin tıgizedi degen sóz.
Árıne, elimizdegi eń tómengi jalaqy deńgeıi damyǵan elderdiń kórsetkishterimen tereze teńestire almaıdy. Alaıda Ortalyq Azııa elderimen úzeńgi qaǵystyra alatyny anyq. Sondyqtan Memleket basshysy bul sheshimdi durys áli ýaqtyly qabyldady degen pikirdemin.
Eńlik NURǴALIEVA,
«Eýrazııalyq quqyq qorǵaý ortalyǵy» qoǵamdyq birlestiginiń prezıdenti, zań ǵylymdarynyń doktory, professor
