Bul týraly Bas prokýratýranyń baspasóz qyzmeti habarlady.
Qadaǵalaý organy bankterdiń azamattardan olardyń nesıeleri men qaryzdary boıynsha artyq aqsha qarajatyn ustap qalý faktilerin anyqtady.
Eńbek kodeksinde (115-bap) jáne «Qazaqstan Respýblıkasynda zeınetaqymen qamsyzdandyrý týraly» zańynda (23-bap) tıesili jalaqy men zeınetaqy somasynyń 50%-ynan astamyn óndirip alýǵa tyıym salynǵan.
Alaıda bankter (Kaspi Bank, Eýrazııalyq bank, Qazaqstan Halyq banki, Hoým Kredıt end Fınans Bank) azamattardyń shotyndaǵy aqshalaı qarajattaryn bekitilgen tyıymnan joǵary kólemde esepten shyǵarǵan.
Mysaly, Kaspi Bank О́skemen qalasy turǵynynyń eńbekaqy alýǵa arnalǵan banktik shoty boıynsha «Qazaqstan Halyq Banki» AQ-ǵa tólem talabyn qoıǵan.
Osy talap túskenge deıin jumys berýshi alıment tólemderi úshin eńbekaqynyń jartysyn ustaǵan bolatyn. Nátıjesinde, barlyq ustalynǵan somalardan keıin onyń esep aıyrysý shotynda nebary 16 myń teńge (25%) qalǵan.
Sot sheshimimen talapkerdiń paıdasyna artyq ustalǵan soma óndirilip alyndy, biraq ol úshin sot daýlaryna 9 aı ýaqyt ketti.
Osyndaı faktiler Aqtóbe, Qaraǵandy, Jambyl, Qostanaı jáne Soltústik Qazaqstan oblystarynda anyqtaldy.
«Bul problema bankterdiń aqshalaı qarajattyń banktik shotqa túskenge deıin júrgizilgen atqarýshylyq is júrgizý boıynsha ustaýlardan habardar bolmaýy saldarynan bolyp otyr. Osyndaı áreketterdiń nátıjesinde qaryz alýshylar ózderiniń jalǵyz tabys kózinen zańsyz aıyrylǵan, bul halyqtyń narazylyǵyn týdyrýda», delingen vedomstvo habarlamasynda.
Bas prokýratýranyń usynýy boıynsha Qarjy naryǵyn retteý jáne damytý agenttigi atalǵan problemany kelesi sharalardy qabyldaý arqyly sheshti:
- klıenttiń ótinishi negizinde bankterdiń jáne sot oryndaýshylarynyń artyq tólengen somany 5 jumys kúni ishinde qaıtarý algorıtmi qoldanysqa engizildi;
- Qazaqstan bankteriniń bazasy atqarýshylyq is júrgizý organdarynyń avtomattandyrylǵan aqparattyq júıesimen ıntegrasııalandy.
Agenttiktiń pikirinshe, bul bankterge barlyq kredıtorlardyń eńbekaqy nemese zeınetaqydan jalpy ustalynǵan somalardyń zańda belgilengen 50%-dan aspaýy úshin olardyń klıentinen qandaı shegerimder jasalǵanyn kórýge múmkindik beredi.
