Mazmundy is-shara «Táýelsizdiktiń mádenı negizi» jobasy aıasynda uıymdastyryldy.
Elbasy kitaphanasynyń Mýzeı qundylyqtaryn esepke alý jáne saqtaý qyzmetiniń basshysy Kúláısha Aqtaevanyń aıtýynsha, bul joba – álemdi sharpyǵan pandemııaǵa qaramastan, ult mádenıetiniń kórnekti ókilderiniń ónerin nasıhattaýdy maqsat tutqan.
−Jeńis Kákenulynyń kórmesi – avtor áleminiń aınasy. Onyń týyndylary tabıǵatqa, qustarǵa, úılesimdikke umtylady. Qanyq boıaýlarǵa toly sýretter shyǵarmashylyq beıneler men tylsym náziktikti ábden sińirgen. Usynylǵan serııadaǵy ár jumys birtutas rýhanı mazmundy quraıdy, – dedi kórmeniń ashylýynda Kúláısha Aqtaeva.
Kórmege talantty qylqalam sheberiniń adamnyń ishki jan dúnıesine úńilip, jańasha izdenispen zerdelegen eńbekteri usynyldy.
«Qulanshy» zamanaýı óner ortalyǵy kýratorlyq keńesiniń tóraǵasy, Eýrazııa óner akademııasynyń prezıdenti Láılá Mahat óz sózinde avtordy buryn keskindemeshi retinde bilse, endi grafıkalyq sýretshi retinde jaqyn tanyǵandyǵyn aıtty.
− О́nerdiń damý tarıhyna úńilsek, áleýmettik-ekonomıkalyq nemese saıası ózgerister sekildi daǵdarys pen synaqtar kezinde óner salasynyń túrli baǵyttary damyp, jańa kezeńge qadam basqanyn ańǵarasyz. Jeńis Kákenuly da pandemııa tusynda jańa qyrynan ashyla tústi. Sýretshiniń jumystarynan onyń qoltańbasy seziledi, alaıda túster men shtrıhterden ózgeris baıqalady, − deı kelip, ol avtordy Eýrazııa óner akademııasynyń músheligine qabyldanýymen quttyqtady.
Mádenı is-shara barysynda avtordyń ózi de osy ýaqytqa deıin shyǵarmashylyǵyna ultymyzdyń tarıhy men mádenıetin, folkloryn arqaý etip kelse, bul rette jalpy adamzat bolmysy men qundylyqtaryna súıenip, jan álemin beıneleýge kúsh salǵandyǵyn jetkizip, kórmeni uıymdastyrýshylarǵa rızashylyǵyn bildirdi.
