Federaldyq tergeý bıýrosy AQSh-taǵy Saýd Arabııasynyń azamattary men 11 qyrkúıek aıynda bolǵan lańkestik oqıǵa arasyndaǵy baılanysty zertteıtin qupııa qujatty jarııalady.
Jarylysta qaza tapqandardyń týystary saýdııalyq sheneýnikterdiń bul týraly aldyn ala bilgenin, biraq shabýyldy toqtatýǵa tyryspaǵanyn alǵa tartyp, qupııa qujattardy ashýǵa shaqyrdy. Biraq qujatta Saýd Arabııasy úkimetiniń 11 qyrkúıek oqıǵasyna qatysqany týraly eshqandaı dálel joq. Ushaqtardy urlaǵan 19 adamnyń 15-i Saýd Arabııasynyń azamaty boldy.
Qujattardy jarııalaý aldynda Saýd Arabııasynyń Vashıngtondaǵy elshiligi kelisim berdi jáne patshalyq pen urlyqshylar arasyndaǵy baılanysty joqqa shyǵardy, mundaı málimdemeni «jalǵan jáne zııandy» dep atady.
Qujat AQSh-taǵy eń joıqyn lańkestik shabýyldyń 20 jyldyǵynda ashyldy. 2001 jyldyń 11 qyrkúıeginde tórt jolaýshylar ushaǵyn urlaǵannan keıin Dúnıejúzilik saýda ortalyǵynyń eki munarasyna soqtyǵysty. Nátıjesinde 3000-ǵa jýyq adam qaza tapty. Bul kópshilikke jarııalanýy múmkin alǵashqy qujattardyń biri.
Keıbir qurbandardyń otbasy prezıdent Djo Baıdennen qujattardy kópshilikke jarııa etýdi talap etti. Eger qujattardy ashýǵa daıyn bolmasa, senbide Nıý-Iorkte ótetin eske alý rásimine qatyspaýǵa shaqyrdy.
Jarııalanǵan 16 bettik qujat áli de qatty óńdelgen. Ol qupııa derekkózge (qujatta PII dep jazylǵan) bergen suhbatqa negizdelgen jáne ushaq urlaǵan Navaf ál-Hazmı men Halıd ál-Mıdhardyń Saýd Arabııasynyń birqatar azamatymen arasyndaǵy baılanysyn sıpattaıdy.
Urlyq jasaǵandar 2000 jyly AQSh-qa kirý úshin ózderin stýdent retinde kórsetken. Federaldyq tergeý bıýrosynyń jazbasynda Omar ál-Baıýmı aıtarlyqtaı materıaldyq-tehnıkalyq qoldaý alǵanyn aıtady. Kýágerlerdiń aıtýynsha, ol stýdent bolǵanyna qaramastan, Saýd Arabııasynyń Los-Andjelestegi konsýldyǵyna jıi keletin.
FTB derekkózi Baıýmı myrzanyń konsýldyqta «mártebesi óte joǵary» bolǵanyn aıtady.
