Bilim jáne ǵylym, densaýlyq saqtaý, mádenıet jáne sport, aqparat jáne qoǵamdyq damý mınıstrleri áleýmettik salanyń negizgi baǵyttary boıynsha jumys týraly baıandady. Memleket basshysynyń 2021 jylǵy 1 qyrkúıektegi «Halyq birligi jáne júıeli reformalar – eldiń órkendeýiniń berik negizi» atty Qazaqstan halqyna Joldaýynda aıtylǵan tapsyrmalaryn oryndaýǵa erekshe nazar aýdaryldy.
Bilim jáne ǵylym mınıstrliginiń derekteri boıynsha, búginde respýblıkada jalpy kontıngenti 250 myń bala bar 147 mektep úsh aýysymda jumys isteıdi. Olardyń eń kóp sany Almaty (50), Mańǵystaý (16) oblystarynda, Shymkent qalasynda (14). Vıse-premer úsh aýysymdy oqytý, oqýshy oryndarynyń tapshylyǵy problemalaryn jedel sheshýdiń mańyzdylyǵyn atap ótti. Bul úshin ońtaıly sheshim tabyldy - tez turǵyzylatyn az shyǵyndy modýldik mektepter salý.
Densaýlyq saqtaý salasynda joǵary bilikti kadrlar tapshylyǵy, aýrýhanalardy qazirgi zamanǵy jabdyqtarmen jaraqtandyrý problemalary ózekti kúıinde qalyp otyr. Búgingi tańda medısına qyzmetkerleriniń áleýmettik qoldaý sharalarymen qamtylýy Túrkistan oblysynda – 7%, Aqtóbe oblysynda – 12%, Almaty oblysynda – 13% jáne Pavlodar oblysynda – 18%.
E.Toǵjanov medısına kadrlaryn daıarlaýǵa arnalǵan granttar sanyn kóbeıtýdi, barlyq jas mamandardy áleýmettik qoldaý sharalarymen qamtamasyz etýdi, oǵan qosymsha qajettilikti anyqtaý úshin medısınalyq jabdyqtarǵa egjeı-tegjeıli túgendeý júrgizýdi tapsyrdy.
Buqaralyq sport salasynda balalardy memlekettik sporttyq tapsyryspen qamtýdyń eń tómen kórsetkishteri Soltústik Qazaqstan, Túrkistan, Qostanaı oblystarynda baıqaldy. Premer-Mınıstrdiń orynbasary halyqty, birinshi kezekte balalardy buqaralyq sportpen qamtýdy ulǵaıtýǵa, dene shynyqtyrý-saýyqtyrý keshenderin, mádenıet obektilerin salýǵa, kitaphanalar men muraǵattar jumysyn jańǵyrtýǵa erekshe kúsh salý kerektigin atap ótti.
Vıse-premer Qazaqstan Respýblıkasy Táýelsizdiginiń Z0 jyldyǵyn merekeleýge búkil qoǵamdy tartý, sondaı-aq iske asyrylyp jatqan memlekettik baǵdarlamalar men jobalarǵa azamattardyń qatysýy úshin aqparattyq-túsindirý jumystaryn jandandyrý jónindegi jumysty kúsheıtýdi tapsyrdy.
Sondaı-aq ákimdikterdiń aqparatyn tyńdaǵan E.Toǵjanov qajetti qarjylandyrý kólemimen qamtamasyz ete otyryp, jergilikti jerlerde áleýmettik sıpattaǵy ózekti máselelerdi sheshý jóninde birqatar naqty tapsyrmalar berdi.
Keńes baǵdarlamasy sheńberinde óńirler ákimderiniń orynbasarlary salynyp jatqan 800 tósektik kópbeıindi ýnıversıtet aýrýhanasynyń jáne BINOM jańa formattaǵy mekteptiń tusaýkeserine qatysty, sondaı-aq tez turǵyzylatyn modýldik mektepter salý arqyly jańa oqýshy oryndaryn qurýdyń ońtaıly nusqalary kórsetildi.
