Bir tańdanarlyǵy, Qurmanbektiń ómirlik jary da temirjolda eńbek etken. Esimi – Gúlden. Ekeýi 1974 jyly otaý qurǵan. Sodan beri erli-zaıyptylar ózderi shamshyraǵyn jaqqan shańyraqtyń shýaǵyna bólenip keledi. Tórt uly men úsh qyzynan otyzdan astam nemere-jıen, eki shóbere súıip otyr.
– Eńbek jolymdy 1969 jyly Qurmanǵazy aýdanyndaǵy Orly orta mektebin bitirgen soń shóp shabatyn mehnızatorǵa tirkeýshi bolyp bastadym. Sol jyly kúzde ásker qataryna shaqyryldym. Eki jyldyq áskerden oralyp, 1971 jyly temir jol salasyna bet burdym. Bastapqyda Ganıýshkındegi №57 dıstansııasynda jol jóndeýshi boldym. Eki jyldan keıin dıstansııa basshylary Jambyl qalasyna 11 aılyq kýrsqa jiberdi. Bul kýrstyń temirjolshy retinde bilimimdi shyńdaýǵa kóp septigi tıdi, – deıdi ómirlik kásibin temirjolmen baılanystyrǵan Qurmanbek Kenjeshov.
Kúni-túni batys pen shyǵysqa aýyr-aýyr vagondar quramyn saldyr-gúldir qozǵap, alys stansalarǵa súıregen teplovozdardyń toqtaýsyz júrýine tikeleı septigi tıgenine marqaıady. О́ıtkeni ár stansanyń janynan «ysqyryp» ótetin, keıde saǵattap kidiretin teplovozdardyń toqtaýsyz júrýi jol jóndeýshiler men monterlerdiń biliktiligine tyǵyz baılanysty. Sol sebepten 11 aılyq kýrstan keıin 4-dárejeli monterlik kásipti meńgergen Qurmanbek Kenjeshov óz isin jaýapkershilikpen atqarýdan jańylmady. Eńbekqorlyqty basty qaǵıdasyna aınaldyrǵan keıipkerimiz basshylar júktegen ár tapsyrmany tııanaqty oryndap, ásirese jastarǵa ónege kórsetti. Sodan shyǵar, 1974 jyly №8 temir jol beketi ashylyp, temirjolshylarǵa jetekshilik etetin brıgadırlik mindet Qurmanbekke júkteldi. Basshylardyń mundaı tańdaýy ony odan ári shıryqtyra tústi.
Oǵan ómirlik jary Gúlden Muhamedjanova udaıy qoldaý kórsetti. Sebebi ekeýi de dana Abaı ulaǵat etkendeı, «Eńbek qylmaı, tapqan mal dáýlet bolmas, qardyń sýy sekildi tez sýalar» degendi basty qaǵıdasyna balady. Ekeýiniń ustanymy – adal eńbek etý. Mańdaı termen tapqan nannyń dámi tátti bolaryn bildi.
– Qurmanbektiń otbasyna 20 jasymda kelin bolyp túsken edim. Ata-enem – ómirden túıgeni mol, óte keremet jandar. Ekinshi dúnıejúzilik soǵysqa qatysqan atamyz beıbit kúnniń, adal eńbektiń qadirin biletin. Alǵashqy nemeresi ómirge kelgende, qýanyshynda shek bolmady. Al enemiz meni qyzyndaı kórip, baýyryna tartty. Bilmegenimdi úıretti, aqyl-keńesin berdi. Ekeýi de «tatý-tátti, qaıyrymdy, qarapaıym bolyńdar, birlikke uıyńdar» dep otyratyn. Osynyń bári qaıtalanbaıtyn ónegege toly tárbıe ǵoı. Qazir kelinderimniń mańdaıyna shań tıgizgim kelmeıdi. Bir úıde eki bala-kelinmen birge turamyz, – dep aqtaryla syr shertedi Gúlden Muhamedjanova.
Ata-enesinen alǵan osynaý tálimdi Gúlden boıyna sińirip, sanasyna túıdi. Qınalǵan janǵa kómek berdi. Qaıyrymdylyq tanytýdan jalyqpady. Qurmanbektiń úlken ápkesi ómirden ótkende artynda qalǵan tórt balasyna bar meıirin tógip, baýyryna basty. Qaıynaǵasynyń bes balasyna da sondaı sharapaty tıdi. Bárin óz balasyndaı tárbıeledi.
Erli-zaıypty temirjolshylar ulaǵatty urpaq tárbıeledi. Balalary ár salada eńbek etedi. Aıbek pen Tólebı munaı salasyn tańdady. Meıramgúl men Anargúl – muǵalim, Baqyt – memlekettik qyzmetshi. Medısınalyq kolledjge oqýǵa túsken Mahambet qazir ásker qatarynda boryshyn ótep júr. Otbasylyq kásiptiń izin jalǵaǵan Asylbek 2006 jyldan beri vagon qurastyrýshy bolyp jumys isteıdi.
– Temir jol salasyn tańdaýyma áke-sheshemniń eńbekqorlyǵy áser etti. Qurmetti temirjolshy atanǵan ákem men oǵan qoldaý bildirgen sheshemdi úlgi tutamyn. Olardyń abyroıly isin jalǵastyrý – paryzym, – deıdi uly Asylbek.
Qazir ekeýi de zeınetker bolǵanymen, úıde qol qýsyryp otyrmaıdy. Otaǵasy sharbaǵyna sıyr men túıe baılap, qoı ósiredi. Al otanasy on jyldan beri baqshasyn baptap, nemerelerin eńbekke baýlyp keledi. «Abyroıdyń da, berekeniń de bastaýy – adal eńbekte. Eńbekqor adamnyń abyroıy bıik, eńsesi tik bolady. Eshkimniń ala jibin attamaı, jumys isteýden jalyqpadyq. Bizdi eńbekqorlyq qana abyroıly, tanymal etti», deıdi erli-zaıypty temirjolshylar bir-biriniń oıyn oqyp qoıǵandaı.
Atyraý oblysy
