Jaıaý ekspedısııa Túpqaraǵan múıisinen bastalyp, Tamshaly saıynda aıaqtalady dep josparlanyp otyr. Zertteýshiler 40 shaqyrym joldy úsh kúnde júrip ótip, avtokólik jete almaıtyn jerlerde ornalasqan, bul kúnderi umytylyp bara jatqan bulaqtarǵa hımııalyq zertteý jumystaryn júrgizbek.
– Bizdiń qatarymyzǵa Túpqaraǵan múıisinen bıologııa pániniń muǵalimderi qosylady. Olar anyqtalǵan bulaqtar sýynyń quramyn zerttep, saraptama júrgizedi. Osylaısha biz umytylǵan bulaqtarmen tanysyp qana qoımaı, olardyń quramyn bile alamyz, deıdi saıahat jetekshisi Birjan Jumashev.
Ekspedısııanyń basty maqsaty – zııatker oqýshylardy týǵan ólke tabıǵatyn zertteýge, izdenýge baýlý. Sapardan soń naqty zertteý jumysy jazylyp, mektepishilik, jelilik kezeńderde qorǵalady.
– Men osyǵan deıin de birneshe ekspedısııaǵa shyqqan bolatynmyn. Sondyqtan úsh kúndik sapar maǵan óte qyzyqty bolady degen úmittemin. Mańǵystaý jeriniń bulaqtaryn zertteý buıyrǵanyna qatty qýanyp turmyn, – deıdi saparǵa attanǵan Dáýren Túrkpenbaev. Ekspedısııa jospary boıynsha jolaýshylar Túpqaraǵan aýdanyndaǵy bes bulaqty zertteıdi.
Mańǵystaý oblysy
