Rásimdi Bas áskerı prokýror ádilet general-leıtenanty Dastan Sartaev pen Arman Qýanyshulynyń anasy Dilda Qapezova ashty.
Arman Qapezovtiń erlik is-áreketi eshqashan umytylmaıdy jáne jas urpaq ony árdaıym este ustaýy kerek.
«Arman Qýanyshuly adamdardy toptastyra biletin jáne áriptester arasynda qurmet pen bedelge ıe bolatyn. Ol óziniń myqty ishki mádenıetimen, erekshe aqylymen jáne joǵary adamgershilik qasıetterimen erekshelenetin. Armannyń jarqyn beınesi bizdiń júregimizde máńgi qalady», dedi Dastan Sartaev.
Esterińizge sala keteıik, aǵymdaǵy jylǵy 26 tamyzda Jambyl oblysy Baızaq aýdanynyń №28349 áskerı bóliminde oq-dárilerdiń jarylýynan Ońtústik aımaǵynyń áskerı prokýrory qaza tapqan bolatyn. Onyń artynda tórt balasy qaldy.
Erligi men janqııarlyǵy úshin Arman Qapezov Memleket basshysynyń jarlyǵymen I-dárejeli «Aıbyn» ordenimen marapattaldy (qaıtys bolǵannan keıin).
Jambyl oblysynyń áskerı bólimindegi qoımalardyń birinde jarylys saldarynan jalpy sany 17 adam qaza taýyp, 100 shaqty adam jaraqat aldy.
Qaza tapqandardyń arasynda órt sóndirýshiler, tótenshe jaǵdaı mınıstrliginiń, áskerı bólimniń, áskerı kúzet pen áskerı prokýratýranyń qyzmetkerleri bar.
