BUU Bas Assambleıadaǵy sessııasynyń taqyryby «Jaqsylyqqa senip, tózimdilikti nyǵaıtý». Kún tártibindegi negizgi máseleler: COVID-19 pandemııasymen kúres, jahandyq qaýipsizdik pen turaqtylyq, ornyqty damý, sondaı-aq klımattyń ózgerýi. Sonymen qatar Aýǵanstandaǵy jaǵdaıǵa erekshe nazar aýdarylatyn bolady.
Sessııa sheńberinde Azyq-túlik júıeleri jónindegi sammıt, Energetıka jónindegi joǵary deńgeıdegi dıalog, COVID-19 jónindegi Jahandyq sammıt, Teńizge shyǵa almaıtyn damýshy elder tobyna múshe memleketterdiń mınıstrlik kezdesýi, Iаdrolyq synaqtarǵa jan-jaqty tyıym salý týraly sharttyń kúshine enýine járdemdesý jónindegi mınıstrlik konferensııasy ótedi.
Qazirgi sessııa gıbrıdti rejımde ótip jatyr. Nıý-Iorkte 120-ǵa jýyq memleket ókili pikirtalasqa qatysady. BUU-ǵa múshe 196 eldiń memleket, úkimet, syrtqy saıası vedomstvo basshysy men joǵary ókili sóz sóıleıdi. Qazaqstan Respýblıkasynyń atynan beıne úndeý formatynda Memleket basshysy Qasym-Jomart Toqaev sóz sóıleıdi.
«Qazaqstannyń syrtqy saıası vedomstvosy basshysynyń baǵdarlamasynda birqatar ekijaqty kezdesý men kópjaqty is-sharaǵa qatysý josparlanǵan. Birinshi kúni Mınıstr M.Tileýberdi Lıtva syrtqy ister mınıstri Gabrıelıýs Landsbergıs, Sıngapýr Syrtqy ister mınıstri Vıvıan Balakrıshnan, Aýstrııa Syrtqy ister mınıstri Aleksandr Shallenberg, Sırııa Syrtqy ister mınıstri Feısal Mıkdad jáne Chernogorııa Syrtqy ister mınıstri Djordje Radýlovıchpen ekijaqty bólek kelissózder júrgizdi. Sonymen qatar, Mınıstr Aýstrııa Kansleri Sebastıan Kýrs uıymdastyrǵan «Aýǵanstan halqyn, ásirese Aýǵanstan men óńirdegi áıelder men balalardy qorǵaý» Aýǵanstan boıynsha joǵary deńgeıdegi dóńgelek ústelge qatysty», dep jazady SIM baspasóz qyzmeti.
