Qazaqstan men Qytaı shekara temir joldary aralas komıssııalarynyń 30-otyrysy aıaqtaldy. Qazaqstan delegasııasyn «Qazaqstan temir joly» UK» AQ Basqarma Tóraǵasynyń júk qozǵalysy jónindegi orynbasary Oralhan Qulaqov, Qytaı delegasııasyn Qytaı temir joldary korporasııasy «Úrimshi temir joly» JShQ Basqarma Tóraǵasy Gao Szıanıan basqardy.
Keńes barysynda taraptar júk tasymaly salasyndaǵy yntymaqtastyq máselelerin talqylady. Koronavırýs ınfeksııasynyń jahandyq pandemııasy eki el arasyndaǵy júk tasymalyna áser etkeni atap ótildi.
Taraptar epıdemıologııalyq jaǵdaı jaqsarǵan kezde júk tasymalyn ulǵaıtýǵa yqpal etýge daıyn ekenin bildirdi. 2021 jyly temirjol shekaralyq ótkelderi arqyly 21 mln tonna, onyń ishinde Qytaıdan Qazaqstanǵa - 8,8 mln tonnadan astam, keri baǵytta 12,2 mln tonna júk tasymaldanady dep kútilýde. 2021 jyldyń 8 aıynda Dostyq-Alashańqaı jáne Altynkól-Qorǵas temirjol shekaralyq ótkelderi arqyly 14,4 mln tonna júk tasymaldanǵan. Bul ótken jyldyń sáıkes kezeńimen salystyrǵanda 2%-ǵa artyq. Onyń ishinde Qytaıdan 8,5 mln tonna, keri baǵytta 5,9 mln tonna júk tasymaldanyp, ótken jylǵa qaraǵanda ósim 24% qurady.
Keńes barysynda qazaqstandyq tarap Qytaıdyń astyq júkterin qabyldamaýyna alańdaýshylyq bildirdi. Kórshi elmen shekarada 1400-ge jýyq astyq tasyǵysh pen 300 jabyq vagon qabyldaýdy saryla kútip tur. «QTJ» UK» AQ 1 qazanǵa deıin astyq júkterin qabyldaý men túsirýdi júzege asyrýdy, sondaı-aq kún saıynǵy poıyzdar almasý josparynda astyq júkteri bar bir poıyzdy qabyldaýdy surady. О́z kezeginde Qytaı tarapy Alashańqaı stansııasyndaǵy joldy qaıta jóndeýge baılanysty úıilgen astyqty túsirý múmkin emes ekenin atap ótti.
Sondaı-aq, qazaqstandyq tarap QR ımporttaýshylarynyń shaǵymyn aıtyp, áriptesterine Qytaıdan júkti tolyq kólemde jóneltýdi surady.
«О́z kezeginde Qazaqstan tarapy barlyq júkti kidirissiz qabyldaýǵa daıyn», dep jazady QTJ baspasóz qyzmeti.
