Qoǵam • 27 Qyrkúıek, 2021

Etnomedıasııa negizderi túsindirildi

108 ret kórsetildi

Qoldanbaly etnosaıası zertteýler ınstıtýtynyń muryndyq bolýymen Taraz qalasyndaǵy Dostyq úıinde «Etnosaıası saýat­tylyq jáne etnomedıasııa negizderi» taqyrybynda eki kún­dik semınar-trenıng ótti. Is-sharaǵa Almaty, Jambyl jáne Túrkis­tan oblystary jergilikti polısııa organdary, prokýratýra ókilderi men ishki saıasat bólimderiniń qyzmetkerleri qatysty.

Semınarda Aqparat jáne qo­ǵam­dyq damý mınıstrligi Etnosaralyq qaty­nastardy damytý komıteti tór­aǵasynyń orynbasary Aıbek Jaq­sybaev, ınstıtýt dırektory Talǵat Qa­lıev, sondaı-aq ınstıtýttyń jetek­shi sarapshylary sóz sóılep, tár­tip saqshylary, prokýrorlar men ákim­dik ókilderimen birge etnosaıası saýat­tylyqty arttyrý máselesi tóńireginde oı bólisti. Trenıng kezinde ultaralyq qatynastardyń erekshelikteri men qaqtyǵystar týyndaǵan jaǵdaıda aqparatty qalaı berý qajet, ultaralyq arazdyqty boldyrmaýdyń joldary qandaı degen suraqtar talqylanyp, naqty keısterge taldaý jasaldy.

Etnosaıası saýattylyqty arttyrý, etnosaralyq qatynastar sala­sy­nyń erekshelikterin jáne oqıǵanyń qate ın­terpretasııasynyń saldary jan-jaqty túsindirilgen basqosý bary­synda «Konflıktologııa jáne etnomedıasııanyń negizderi», «Aqpa­rattyq jáne medıalyq saýatty­lyq. Aqpa­rattyq keńistiktegi etnosara­lyq qaty­nastar», «Qazaqstannyń etnostyq toptary arasyndaǵy ózara qarym-qa­ty­nastyń áleýmettik-psı­hologııalyq erek­shelikteri. Jan­jaldyń aqparattyq komponenti. Alaýyzdyq tili. Janjaldyń dekla­ratıvti kezeńindegi beınormatıv­ti etnonımderi», «Qoǵamdyq rıtorıka daǵ­dylary» taqyryptaryna arnalǵan dá­rister toptamasy usynyldy.

Semınar sońynda qatysýshylarǵa alǵan bilimderi men daǵdylaryn bekitý úshin Qoldanbaly etnosaıası zertteýler ınstıtýtynyń sarapshylary táji­rıbelik sabaqtar ótkizip, bilikti mamandar quqyq qorǵaý organdary men ishki saıasat bólimderiniń ókilderine etnomedıasııa daǵdylaryn úıretýge baǵyt­talǵan trenıngter uıymdastyrdy. Instıtýt mamandary mundaı semınarlardy aldaǵy ýaqytta elimizdiń basqa da óńirlerinde ótkizýdi josparlap otyr.

 

Sońǵy jańalyqtar

Uqsas jańalyqtar