Mańǵystaý oblysynyń ákimi, «Nur Otan» partııasy Mańǵystaý oblystyq fılıaly Saıası keńesiniń múshesi Nurlan Noǵaevtyń tóraǵalyǵymen partııanyń oblystyq fılıalynda Saıası Keńes Bıýrosynyń otyrysy ótti.
Kún tártibinde «Nur Otan» partııasynyń «Mańǵystaý oblysynyń 2021-2025 jyldarǵa arnalǵan «О́zgerister joly: ár azamatqa laıyqty ómir!» saılaýaldy baǵdarlamasyn iske asyrý jónindegi jospary qaraldy. Josparǵa áleýmettik nysandar qurylysy, jol ınfraqurylymy, halyqty jumyspen qamtý, shaǵyn jáne orta bıznesti damytý jáne t.b., barlyǵy 112 shara engizilgen.
Saıası Keńes Bıýro otyrysynda bekitilgen jol kartasynyń Mańǵystaý oblysy boıynsha saılaýaldy mindettemelerin oryndaý aıasynda «Nur Otan» partııasynyń oblystyq, qalalyq, aýdandyq saılaýaldy baǵdarlamalaryna júıeli monıtorıng uıymdastyrǵan. Oblysta jáne aýdandar men qalalarda arnaıy shtab jumys isteıdi.
Jyl basynan beri júrgizilgen taldaý nátıjesinde barlyǵy 112 is-sharanyń 41-i oryndaldy, 6-y oryndalý satysynda, altaýynyń oryndalmaý qaýpi bar, 4-i aýystyrýdy qajet etedi.
«Bul jumystarǵa memlekettik organ basshylary jaýapty. Halyq bizden jol kartasyn sapaly júzege asyrýdy kútedi, sondyqtan biz ózimizge artylǵan senimdi aqtaýǵa mindettimiz. Jospardyń oryndalmaýy ákimder men basqarma basshylary arasynda ishki baılanystyń joqtyǵyn kórsetip tur. Bul iske degen júıeli jumystyń joqtyǵy. Bárimiz bir baǵytta jumys isteýimiz kerek. Sonda ǵana aldymyzǵa qoıylǵan mindetterdi oryndap, óz múmkindikterimizdi tıimdi paıdalanatyn bolamyz», dedi Nurlan Noǵaev.
Otyrys sońynda Mańǵystaý oblysy ákiminiń birinshi orynbasaryna, Qaraqııa jáne Beıneý aýdandarynyń ákimderine «Nur Otan» partııasynyń jol kartasyn durys baqylamaǵany jáne tıisinshe oryndamaǵany úshin sógis túrinde partııalyq jaza berildi.
Nurlan Noǵaev jaýapty tulǵalarǵa júktelgen mindetterdi merziminde oryndaýdy tapsyrdy.
