Taıaýda «ArselorMıttal Temirtaý» kompanııasy osy baǵytta ıgi is-shara uıymdastyryp, vaksına saldyrǵan qyzmetkerler arasynda eki Lada Vesta avtokóligin utysqa oınatty.
Onlaın rejiminde bolat jáne kómir departamentteriniń qyzmetkerleri arasynda ótken utys oıynynda jeńimpazdar kezdeısoq sandar generatorynyń kómegimen anyqtaldy. Oıynnyń ashyqtyǵyn qamtamasyz etý maqsatynda baqylaýshylar retinde kásipodaq ókilderi men qyzmetkerleri, sondaı-aq jýrnalıster men blogerler qatysty.
Utys oıynynyń qorytyndysy boıynsha, metallýrgııa zaýytyndaǵy konvertorlyq sehtyń dánekerleýshi-jóndeýshisi Nurhan Smaǵulov pen Túsip Kúzembaev atyndaǵy shahtanyń jeldetý jáne qaýipsizdik tehnıkasy ýchaskesiniń jerasty elektr slesari Talǵat Shaýǵymbekov jeńimpaz dep tanylyp, sý jańa temir tulparlardy taqymǵa basty.
Utys ıegeriniń biri Nurhan Smaǵulovtyń kompanııada jumys istep júrgenine bir jyl da bolmaǵan. Joly bolǵysh jumysshy avtokólik utqanyn túngi aýysymnan kelgen bette sehtaǵy áriptesterinen estipti.
Al ekinshi utysker Talǵat Shaýǵymbekov bolsa, oıyn onlaın ótip jatqanda jer astyndaǵy jumys narıadyn oryndap júripti. Avtomobılge ıe bolǵanyn jer ústine kóterilgende bir-aq estigen.
Temir tulparlardan bólek, onlaın utys kezinde turmystyq tehnıkany satyp alýǵa árqaısysynyń nomınaly 50 myń teńge bolatyn 20 sertıfıkat ta oınatyldy.
Bul ıgi joba aldaǵy ýaqytta da jalǵasyn tabatynyn aıtady uıymdastyrýshylar. Mysaly, 14 qazan kúni temir keni departamenti men enshiles kásiporyndar qyzmetkerleri arasynda taǵy da avtokólikter oınatylmaqshy.
Qaraǵandy oblysy
