Jobany «Royal Hijyen» túrik kompanııasy Túrkistan oblysynyń «CaPable Group» múgedekter qoǵamymen birlesip júzege asyrady. Oǵan QR SIM, Qazaqstannyń Túrkııadaǵy Elshiliginiń, «Kazakh invest» UK» AQ, sondaı-aq óńir ákimdigi qoldaý bildirip otyr. Qazaqstan ekonomıkasyna salynǵan ınvestısııalardyń jalpy kólemi 3 mln dollardy qurady.
Saltanatty sharaǵa QR Túrkııadaǵy Elshisi Abzal Saparbekuly, Túrkistan oblysynyń ákimi О́mirzaq Shókeev, Túrkistan oblysy ákiminiń orynbasary Rashıd Aıýpov, túrik kompanııasynyń basshylyǵy jáne t. b. qatysty.
Zaýytta 50-ge jýyq jumys orny ashylady. Aıta keteıik, joba áleýmettik maqsatta ashylǵan. Fabrıkada jumys isteıtin adamdardyń 60%-yn erekshe qajettilikteri bar adamdar quraıdy.
Investordyń aıtýynsha, óndiristiń birinshi kezeńinde balalarǵa arnalǵan, al ekinshi kezeńinde eresekterge arnalǵan jórgek shyǵarylady. Sonymen qatar, jylyna 100 mln dana jaıalyq shyǵaryp, tolyq qýattylyqqa shyqqannan keıin EAEO jáne TMD elderine eksportqa shyǵý josparlanyp otyr.
«Bul otandyq eksporttyq áleýetti arttyrýǵa múmkindik beredi», dep jazylǵan «Kazakh invest» baspasóz habarlamasynda.
