«Qurmetti radıo qyzmetkerleri! Sizderdi búgingi kásibı merekelerińizben shyn júrekten quttyqtaımyn! Memleket basshysynyń bastamasymen belgilengen bul kún bıyl elimizde alǵash ret atalyp ótýde. Onyń ózindik máni bar. Sebebi, bıyl otandyq radıolardyń qarashańyraǵy Qazaq radıosynyń habar tarata bastaǵanyna týra 100 jyl tolyp otyr. Osy jyldardyń ishinde Qazaq radıosy halqymyzdyń kúndelikti tynys-tirshiliginen bastap tarıhymyz ben dástúrimizdi, ádebıetimiz ben mádenıetimizdi, ónerimiz ben ulttyq qundylyqtarymyzdy dáripteýge úlken úles qosty», dedi Senat Tóraǵasy.
Sondaı-aq joǵary palata basshysy ár jyldary osy ujymda Ámire Qashaýbaev, Ahmet Jubanov, Sháken Aımanov, Shámshi Qaldaıaqov sııaqty birtýar tulǵalar eńbek etkenin, qazaq dıktorlyq mektebiniń shyńynda turǵan Ánýar Baıjanbaev, Mına Seıitova, Saýyq Jaqanova sııaqty maıtalman mamandar ult maqtanyshyna aınalǵanyn atap ótti.
«Qazirgi tańda Qazaq radıosynyń «Altyn qorynda» saqtalǵan ánder men kúıler, suhbattar men áńgimeler, jańalyqtar men sholýlar ultymyzdyń bir ǵasyrlyq shejiresi dese, artyq emes. Baýyrjan Momyshuly, Muqaǵalı Maqataev syndy uly tulǵalarymyzdyń daýsy saqtalǵan sırek jazbalardyń búginge jetýi sonyń jarqyn kórinisi. Táýelsizdik otandyq radıo salasynyń damýyna tyń serpin berdi. Buryn bir ǵana Qazaq radıosy bolsa, egemendik kezeńinde ondaǵan jańa radıolar ashyla bastady. Olardyń taqyryptyq aıasy da aıtarlyqtaı keńeıe tústi», dedi ol.
Odan bólek, Máýlen Áshimbaev aldaǵy ýaqytta elimizde bul sala budan da erekshe ekpinmen damıtynyna senim bildirdi.
«Elimizdegi barsha radıo qyzmetkerlerin tól merekelerimen quttyqtaı otyryp, zor densaýlyq jáne shyǵarmashylyq tabys tileımin! Ultty uıystyratyn jáne otanshyldyqqa úndeıtin habarlaryńyz kóp bolsyn!» dep aıaqtady sózin ol.
