«Qaıǵyly jaǵdaılardyń negizgi sebebi – zardap shekkenderdiń jeke qaýipsizdik erejelerin saqtamaýy jáne uqypsyzdyǵy. Azamattar temir joldardyń ruqsat etilmegen jerlerinen ótýge tyrysady. Lokomotıv brıgadalarynyń sheberligi men kásibıliginiń arqasynda 90% jaǵdaıda adamdardy qaǵyp ketýge jol berilmeıdi», dep jazady «Qazaqstan Temir joly».
«Saǵatyna 60-80 shaqyrym jyldamdyqpen júretin 6 myń tonnalyq poıyzdy birden toqtatý múmkin emes. Salmaǵy 200 tonnadan asatyn lokomotıvke 600-800 metrlik tejeý joly qajet bolady», dep túsindirdi «QTJ» UK» AQ Magıstraldyq jeli dıreksııasy dırektorynyń orynbasary Baqytbek Aldajarov.
Baspasóz málimteinshe, zardap shekken árbir besinshi adam mas kúıde bolǵan.
Bıyl temir jol boıynda tirkelgen barlyq jaǵdaıdyń 14%-y sýısıdtik sıpatqa ıe.
«Temir jol ınfraqurylymy nysandaryna jaqyndaǵanda adamdar qulaqqaptaryn alyp tastaýdy umytyp ketedi, sondyqtan da jaqyndap qalǵan poıyz dybysyn jáne lokomotıv brıgadasynyń soqqan dabylyn estimeıdi. Zardap shekkenderdiń shamamen 3% qulaqqappen mýzyka tyńdaǵan», delingen habarlamada.
Jasóspirimder áleýmettik jelilerge arnalǵan selfı men túrli beınelerdi túsirý kezinde temir jolda jaraqat alady. Keıde olar ómirine qaýip tónse de, eń qaýipti jerlerdi tańdaıdy.
Temir joldaǵy taǵy bir qaýip – 27 myń voltty joǵary elektr kerneýine túsý. Oıyn-saýyq izdep balalar vagondardyń tóbesine kóterilse, ólimge ákeletin jaraqat alýy múmkin.
«Temir joldaǵy jazataıym oqıǵalar qoǵamǵa úlken zııan keltiredi. Birinshiden, bul adam shyǵyndarynyń orny tolmas sıpaty. Elimizdiń barlyq óńirinde turǵyndar arasynda, kóbinese bilim berý mekemelerinde túsindirý jumystaryn turaqty negizde júrgizemiz. Temir joldaǵy júris-turys erejeleri boıynsha jadynamalar shyǵarylady. Olar temir jol serýendeý, balalarǵa arnalǵan kóńil kóterý, selfı túsirý úshin arnalmaǵanyn eskertedi. Jazataıym oqıǵanyń qurbany bolmaý úshin ár adam temir jol kóligindegi qaýipsizdik erejelerin bilýi jáne saqtaýy tıis», dedi Baqytbek Aldajarov.
Temir joldy tek belgilengen jerler men jabdyqtalǵan oryndardan ǵana, onda da jaqyndap kele jatqan poıyzdyń joqtyǵyna nemese ótkeldegi belgi berý quralynyń ruqsat beretin belgisine kóz jetkizip baryp ótýge bolady.
«Azamattar temir joldaǵy tártip erejelerin múltiksiz saqtap qana qoımaı, ózgelerge, eń aldymen balalarǵa eskertý jasaýy tıis», dep eskertedi QTJ.
Temirjolshylar magıstraldyq joldar arqyly jerústi jaıaý júrginshiler ótkelderin salý jaraqattanýdy azaıtýǵa múmkindik beredi dep esepteıdi. Bul másele jergilikti atqarýshy organdardyń quzyretinde.
