Saltanatty is-sharanyń ashylýynda sóz alǵan Nur-Sultan qalasy ákiminiń orynbasary Ashat Oralov el tarıhyndaǵy aıtýly tulǵalardy ulyqtaý – bizdiń paryzymyz deı kelip: «Búgin biz sanaly ǵumyryn aǵartý isine arnaǵan uly tulǵamyzdyń bıýstin ashýǵa jınalyp otyrmyz. Bul aǵartýshynyń 180 jyldyq mereıtoıyna arnalǵan aıtýly shara dep sanaımyn. Aldaǵy tańda dál osy №83 orta mektebine Ybyraı Altynsarınniń esimi beriledi dep josparlap otyrmyz» dese, aqyn, Memlekettik syılyqtyń laýreaty Nesipbek Aıtuly: «Bir Allaǵa sıynyp, kel balalar oqylyq», dep jyrlap, Torǵaı dalasynda alǵash ret qazaq mektebiniń qońyraýyn syńǵyrlatqan Ybyraı atamyzdyń músininiń elordanyń tórinen boı kóterýi − qazaq úshin úlken maqtanysh!», dep tolǵandy.
Al L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov búginde elimiz uly ustaz armandaǵan zamanǵa qol jetkizgenin aıtyp, keıingi jyldardaǵy bilim salasynda júzege asqan jemisti jumystarǵa toqtaldy.
− Jaqynda el Prezıdenti Qasym-Jomart Toqaev 1000 mektep salý baǵdarlamasyn alǵa qoıdy. Elordamyzda taıaý jyldary 50-ge tarta mektep salynbaqshy. Qazirdiń ózinde úsh aýysymdaǵy mektepter joq. Osynyń bári bilim jáne ǵylym salasynda júrgizilip jatqan reformalardyń arqasy dep bilemin. Muǵalimderdiń mártebesin kóterý baǵytynda da jańasha sheshimder qabyldandy. Ustaz bolam degen stýdentterdiń shákirtaqysy kóterildi. Mine, munyń bári pedagogterdiń dárejesi men abyroıynyń kóterilýine septigin tıgizedi» dedi belgili ǵalym.
Aıta keteıik, bas qalanyń tórine kelip oryn tepken Ybyraı Altynsarın bıýstiniń bıiktigi, tuǵyrymen qosa alǵanda tórt metrden asady. Týyndy avtory – Nurbol Qalıev.
