Kórneki sýret. Foto: tengrinews.kz
«Petropavlovsk News» jazýynsha, QR AShM Veterınarlyq baqylaý jáne qadaǵalaý komıtetiniń Soltústik Qazaqstan oblysy boıynsha aýmaqtyq ınspeksııasy bastyǵynyń orynbasary Sergeı Kalıakın (ol sondaı-aq Ádep jónindegi keńestiń ýákiletti ókili) jáne sol komıtettiń Esil aýdandyq aýmaqtyq ınspeksııasynyń bastyǵy Tańatar Aıhojaev kafede shý shyǵaryp, ydys-aıaq syndyrǵan. Medısınalyq saraptama olardyń ortasha dárejede alkogoldik mas kúıde bolǵanyn kórsetti. Sheneýnikter veterınarlyq sharalardy júrgizý úshin issaparǵa jiberilgen.
Derekkózdiń aqparatyna súıensek, ádep jónindegi keńeste Sergeı Kalıakınniń is-áreketi tolyqtaı qaralmastan, jaı ǵana qyzmetinen bosatylǵan. Sondyqtan ol biraz ýaqyttan keıin qaıtadan memlekettik qyzmetke ornalasa alady. Al Tańatar Aıqojaevtyń áreketi keńeste egjeı-tegjeıli qaralǵan.
Keńeste kópshilik Aıhojaevty aqtaýǵa tyrysqan. Ony jumystan shyǵarmaı, qatań sógis berýmen shektelýdi usynǵandar qarasy qalyń bolǵan. Alaıda Ádep jónindegi keńes veterınarlyq baqylaý jáne qadaǵalaý komıtetiniń Esil aýdandyq aýmaqtyq ınspeksııasynyń basshysy Tańatar Aıhojaevty qyzmetinen bosatýdy usyndy.
