Naqty qabileti bar, bilimi joǵary jastardyń muǵalim mamandyǵyna bet burýyna jaǵdaı jasaý nazarǵa alynýda. Buryn UBT tapsyrǵan oqýshylardyń ishinde tómen ball jınaǵan oqýshylar muǵalim mamandyǵyna túsip ketetin edi. Al búginde, kerisinshe, «Altyn belgi» ıegeri atanǵan jastardyń basym bóligi muǵalim mamandyǵyn tańdaýda. Bul neni bildiredi? Memlekettiń mańyzdy salalarynyń ishinde basqa mamandyqqa qaraǵanda muǵalim mamandyǵynyń mańyzdy ekenin túsinip kele jatqanymyzdyń bir belgisi dep aıta alamyn.
Sonymen qatar jańartylǵan bilim berý mazmuny boıynsha kóptegen ózgeris bar. Buryn oqýshy baǵa úshin oqıtyn bolsa, qazir oqýshy bilim úshin oqý kerektigin túsinip kele jatyr. Sebebi búginde oqý barysynda balaǵa naqty deskrıptor beriledi. Sol deskrıptor sheńberinde baǵalaý krıterııleri usynylady. Osyǵan sáıkes oqýshy óz biliminiń naqty qaı deńgeıde turǵanyn anyqtaı alady. Bul arqyly oqýshylar arasynda qarama-qaıshy pikirler týyndamaıdy. Sondaı-aq sabaqta ártúrli ádis-tásilder keńinen qoldanylady. Mysaly, dıalogtik oqytý ádisi, Djıgso ádisi, fıshboýn ádisi jáne róldik ádisterdi aıtýǵa bolady.
О́zim elordadaǵy Máshhúr Júsip atyndaǵy №57 orta mektepte 10 jyl kóleminde ustazdyq etip kelemin. Osy ýaqyt aralyǵynda biraz oqýshym olımpıada, ǵylymı joba saıystarynda, ǵylymı-praktıkalyq konferensııalarda, ártúrli baıqaýlarda jeńimpaz atandy. Men sabaqta vızýaldy derekterdi keńinen qoldanamyn. О́ıtkeni oqýshy kitaptaǵy mátin túrindegi aqparattardy oqýy múmkin, biraq ony tez umytyp qalady. Sol mátin túrindegi aqparattardy aýdıo, beınegrafıka, dıagramma, anımasııa túrinde jetkizýge tyrysamyn. Bul oqýshylardyń este saqtaý qabiletterin, shyǵarmashylyq izdenisterin arttyrýǵa yqpal etedi.
Qazir Bilim jáne ǵylym mınıstrligi jańa jobalardy júzege asyryp jatyr. Onyń biri – «Sıfrly muǵalim» jobasy. Bul arqyly sıfrly tehnologııany qoldanyp, Qazaqstan boıynsha bilikti ustazdar kóptegen mekteptiń oqýshylaryn birlestire otyryp, sabaq berýge múmkindik alady. Bolashaqta oqýshy muǵalimdi tańdaý dárejesine jetýimiz kerek. Bul muǵalimder arasynda da básekelestikti arttyryp, sapaly bilim berýge jaǵdaı týǵyzady.
2020-2021 oqý jylynda «Habar» telearnasynyń qoldaýymen túsirilgen «Tele-sabaq» jobasyna jyl boıy qatysyp, «Balapan» telearnasynan 120-dan asa sabaq berdim. Meniń sabaqtarym respýblıka kóleminde Qazaqstannyń túkpir-túkpirindegi oqýshylarǵa kórsetildi. Dál osyndaı tájirıbe kórsetip jatqanyma qýanamyn jáne elimizdiń bilim berý salasyn damytý jolynda aıanbaı eńbek etýge, bar bilgenimdi bolashaq urpaqqa úıretýge tyrysamyn.
«Úzdik pedagog-2021» baıqaýyna qatysyp, qala kóleminde jáne respýblıka kóleminde jeńimpaz atanyp, osynaý ataqqa ıe boldym. Bilim jáne ǵylym mınıstrligi tarapynan «Úzdik pedagog» tósbelgisimen marapattaldym.
Sarvar KÝLMETOV,
Máshhúr Júsip atyndaǵy
№57 orta mekteptiń geografııa pániniń muǵalimi
