Oblys ortalyǵyndaǵy múmkindigi shekteýli jandarǵa arnalǵan «Mergen» sport klýbynyń janynan taǵdyr tálkegi tánin ǵana emes, janyn da jaralaǵan balalarǵa arnalǵan bólimsheniń ashylýy osy oraıdaǵy uzaq ýaqyt sheshimin tappaı kelgen máseleni ońynan sheship berdi. Qazir «Erekshe ómir» qoǵamdyq qorynyń qamqorlyǵyndaǵy balalar barlyq jaǵdaı jasalǵan sport zalyna baryp, densaýlyqtaryn shynyqtyryp júr. Bir aıta keterligi, áýel basta sport zaly jóndeýden ótkizile qoımaǵan edi. Jaqsy jańalyqtan qulaqtanǵan balalar da uzaq ýaqyt sarǵaıa tosyp júrdi. Jańa bolǵanymen, jóndeý ótkizilmegennen keıin kóńil qulazytyp turady eken.
Kókshetaýlyq kásipker Artem Sınelnıkov múmkindigi shekteýli balalardyń jaıyn oılap, olardy qýantqysy keldi. Qoly epsekti qurylysshylardyń qalaǵynan keıin zal adam tanymastaı ádemi keıipke endi.
– Mundaı balalardan qarajat aıaýdyń qajeti joq, – deıdi kásipker. – Biz áli de kómektese beretin bolamyz.
Qazir súıikti sporttary boılaryn sergitken balalar jaryq, qurqyltaıdyń uıasyndaı jyp-jyly sport zalynda jattyǵyp júr. О́zderi de jıi bas qosatyn, shymyr bolyp shynyǵatyn súıikti oryndaryna úzbeı kelýge yntaly. «Erekshe ómir» qoǵamdyq qorynyń jetekshisi Álııa Rahymbekovanyń aıtýyna qaraǵanda, múmkindigi shekteýli jandarǵa júrek jylýyn darytatyn ujym 2018 jyly qurylǵan. 2 men 13 jas aralyǵyndaǵy balalarmen logopedter, psıhologter jumys isteıdi.
– Sport zalyna óte sapaly jóndeý jumystary jasaldy, – deıdi ol. – Bar jan-tánderin salyp istegenderi kórinip tur. Mundaı zalda jaı ǵana jattyqqannyń ózi jan-dúnıelerin shýaqtandyrady. Aldaǵy ýaqytta ár balanyń densaýlyǵyna baılanysty jeke aınalysatyn sport jabdyqtaryn almaqshymyz.
Barlyq bala baqytty bolý úshin jaratylǵan. Peshenelerine buıyrǵan peıishteı orynda aǵa býynnyń peıilinen júrekterine jylý quıylǵan jasóspirimder alańsyz jattyǵyp júr qazir.
