О́ner ujymy Qazaqstan Táýelsizdiginiń 30 jyldyǵy men Dúnıejúzi qazaqtarynyń kishi quryltaıy aıasyndaǵy is-sharaǵa arnaıy shaqyrylǵan bolatyn.
Konserttik birlestiktiń jetekshisi Talǵat Ydyrysov kishi quryltaıǵa qatysyp, sonymen birge Alanııa, Antalııa, Hataı, Gazıantep, Ystanbul jáne Konıa qalalarynda konsert bergenderin habardar etti.
– Orkestrdiń konsertterin Túrkııanyń 10 myńnan astam kórermeni tamashalady. EKSPO-nyń ashylýyna daıyndalyp jatqan Hataıda amfıteatr zalyn birinshi bolyp synap kórý sáti tústi. Bizge EKSPO ashylýynda da óner kórsetý týraly usynys tústi, – deıdi T.Ydyrysov.
Al Táttimbet orkestriniń dırıjeri Erlan Baqtygereı bolsa, túrik kórermenderiniń ulttyq mýzykalyq aspaptarymyzdyń únine aıryqsha tańǵalyp, erekshe áserge bólengenderin atap ótti.
– Dáýletkereı, Qurmanǵazy, Táttimbet, Mahambettiń kúıleri men Nurǵısa Tilendıevtiń zamanaýı ánderin oryndadyq. Sonymen qatar belgili túrik kompozıtorlarynyń shyǵarmalary, túrik ánderine popýrrı oryndaldy. Kórermenderge unaǵany sonsha, olar oryndarynan turyp ketip, bı bıledi, án saldy, – deıdi dırıjer.
Aldaǵy kúnderi atalǵan óner ujymy jańa konserttik maýsymyn ashady. Orkestr repertýarynda qazaq jáne orys klassıkteriniń shyǵarmalary, sondaı-aq gastrolder baǵdarlamasynan ánder bolady dep josparlanǵan.
