Foto: Aqorda
Memleket basshysyna Komıssııanyń jańa Konstıtýsııa jobasy boıynsha atqarǵan jumysy týraly málimet berildi.
Elvıra Ázimova Komıssııanyń osyǵan deıin ótken on eki otyrysynyń nátıjesinde jańa Ata Zańnyń qorytyndy jobasy ázirlengenin baıandady.
Jańa Konstıtýsııa mátini azamattar men sarapshylardyń byltyr qazan aıynan bastap eGov jáne e-Otinish portaldaryna joldaǵan bastamalary negizinde daıyndaldy. Sondaı-aq jobada Parlamenttik reforma jónindegi jumys toby qazan-qańtar aılary aralyǵynda jınaqtaǵan tásilder de eskerildi.
Baqyt Nurmuhanov: Jańa Konstıtýsııanyń jobasynda ótpeli erejeler naqtylandy
Elvıra Ázimova Konstıtýsııalyq komıssııa talqylaý qorytyndysy boıynsha jańa Konstıtýsııa jobasyn jalpyhalyqtyq referendýmǵa shyǵarýdy usynatynyn jetkizdi.
Memleket basshysy Konstıtýsııalyq komıssııanyń óte aýqymdy ári mańyzdy jumys atqarǵanyn atap ótti. Prezıdenttiń pikirinshe, jańa Konstıtýsııa erejeleri memleketimizdiń ınstıtýsıonaldyq negizin transformasııalaý úderisi tolyǵymen aıaqtalyp, múlde jańa konstıtýsııalyq úlgige kóshetinin kórsetedi.
Serik Egizbaev: Jańa Konstıtýsııa qoǵam suranysyna jaýap beredi
Qasym-Jomart Toqaev jańa Ata Zań jobasy qoǵamdaǵy ózekti qundylyqtar men memlekettik saıasat qaǵıdattaryn aıqyndap qana qoımaı, Qazaqstannyń odan ári progressıvti damýyna negiz qalaıtynyn aıtty.
Prezıdent mańyzdy jumysty kásibı turǵyda atqarǵan Konstıtýsııalyq komıssııa múshelerine rızashylyǵyn bildirdi. Sondaı-aq Komıssııa músheleriniń jańa Konstıtýsııa jobasyn tikeleı efırde talqylaýy qoǵamdyq dıalogtiń joǵary deńgeıin tanytqanyna nazar aýdardy.
Magerram Magerramov Konstıtýsııa jobasyn referendýmǵa shyǵarýdy usyndy
Budan bólek, Memleket basshysy jobany ázirleý men talqylaýǵa myńdaǵan azamattyń belsene atsalysqanyna toqtalyp, bul «Halyq únine qulaq asatyn memleket» tujyrymdamasyna saı keletinin jáne jańa Konstıtýsııanyń shynaıy halyqtyq sıpatyn kórsetetinin atap ótti.
Qasym-Jomart Toqaev taıaý arada jańa Konstıtýsııany qabyldaý boıynsha respýblıkalyq referendým ótkizý týraly Jarlyqqa qol qoıatynyn málimdedi.
