Mınıstr Almatydaǵy stýdenttik jataqhanalarda qansha oryn jetispeıtini týraly aıtty. Onyń aıtýynsha, 2019 jyly el boıynsha jataqhana tapshylyǵy 82 myńnan astam oryndy quraǵan. Qazir oryn jetispeýshiligi tek Almaty qalasynda ǵana saqtalyp otyr.
«Almatyda 5176 oryn jetispeıdi. Jyl sońyna deıin 10 myń orynǵa arnalǵan shamamen 20 jataqhanany paıdalanýǵa beremiz. Bizde memlekettik jáne jergilikti bıýdjet esebinen 10 myń oryn salý jospary boldy. Sonymen qatar sýbsıdııalaý tetigi ózin jaqsy kórsetti. Sońǵy bes jylda osy mehanızmdi paıdalanǵan jeke ınvestorlardyń kómegimen shamamen 60 myń oryn máselesin sheshtik», dedi mınıstr Úkimettegi brıfıngte.
Mınıstrdiń sózinshe, jataqhanaǵa qatysty talaptar qaıta qaralǵan. Qazir mınıstrlik joǵary oqý oryndarynan stýdentterdiń keminde 80 paıyzyn orynmen qamtamasyz etýdi talap etedi.
«Sońǵy 3-4 jylda jataqhana máselesi, stýdentterdi ornalastyrmaý týraly shaǵymdar azaıdy. Qazir bul júıeli túrde jumys istep tur. Tamyz-qyrkúıek aılaryna daıyndyq bastalyp ketti», dedi mınıstr.
Sáýir aıynyń sońynda Joǵary aýdıtorlyq palata joǵary oqý oryndary stýdentterine arnalǵan turǵyn úı tapshylyǵy áli de ózekti ekenin málimdegen bolatyn. 2024-2025 oqý jylynda jataqhanadaǵy oryn tapshylyǵy 10 myńnan asqan.
Stýdentterdi eden jýýǵa májbúrlegen: Túrkistanda jataqhana qyzmetkerleri sógis aldy
