Halyqtyń sándik-qoldanbaly óneri – álemdik kórkem mádenıettiń negizi, danalyq pen ásemdiktiń taýsylmas qaınar kózi. San ǵasyrdan beri jalǵasyp kele jatqan qolóner ulttyq oıý-órnek pen qorshaǵan álemniń san qıly bederin beınelep, tylsym tarıh qoınaýynan syr shertedi. Túrli-tústi reńge boıanǵan ásemdik pen kórkem sheberliktiń ádemi úlgileri usynylǵan kórme kópshilik nazaryn ózine aýdardy. Asylynda, ulttyq salt-dástúr men ádet-ǵurypty eske salýymen qundy. Oblys aýdandarynan kelgen qolóner sheberleri kóz maıyn taýysyp jasaǵan tamasha týyndylarymen tanystyrdy. Qaıta jańǵyrǵan kóneniń kózi Alash jurtynyń yqylym zamannan beri ónerdi serik etkendigin ańǵartady.
– Kórmege 11 aýdan men úsh qalanyń qolóner sheberleri qatysýda, – dedi oblystyq «Qoǵamdyq kelisim» mekemesiniń basshysy Ermek Nuǵymanov. – Bıyl Assambleıa jumysyna birshama ózgerister engizip, barlyq aýdandardy qamtyp jumys istedik. Osyndaı sharalar barlyq aýdandarda ótkizildi. Halyqtyń tól ónerin keńinen nasıhattaýǵa atsalystyq. Eń qýanyshtysy, óner úzilmegen eken.
Qosshy qalasynan kelgen sheberliktiń shyńyna shyqqan Nurjan Dilmanov ulttyq aspaptardyń 52 túrin jasaıdy eken. Kúı áýenimen orǵı sekirgen ortekesi talǵampaz qaýymnyń kóńilinen shyqty.
– Dombyradan bastap, qazaqtyń barlyq ulttyq aspaptarynyń túr-túrin jasaımyn. Shańqobyz, jetigen, qobyz, bas dombyra, sazsyrnaı, syldyrmaq, asataıaq sekildi aspaptardy búginde mektep oqýshylary mýzyka sabaǵyna, óner kolledjderiniń stýdentteri jeke ózderine kóptep tapsyrys berýde. Búginde úsh shákirt tárbıelep shyǵardym, olar da óz sheberhanalaryn ashyp, ulttyq aspap túrlerin tapsyryspen jasaıtyn dárejege jetti, – deıdi sheber.
Halqymyzdyń mádenıeti men dástúrin nyǵaıtýǵa baǵyttalǵan birqatar jańa jobalar iske asyrylýda. El Táýelsizdiginiń 30 jyldyǵy aıasynda oblysta «30 ıgi is», «Myń bala», «Qazaqtaný» ǵylymı-aǵartýshylyq jáne «Bir shańyraq astynda – bir maqsatqa» jobalary qolǵa alynǵan. Búgingi shara sonyń bir dáleli.
Qazylardyń sheshimimen birinshi oryndy Qosshy qalasynan kelgen aǵash jáne teri sheberi Ashat Bozymbaı ıelense, bas júldege shortandylyq sýretshi-qolónershi Bektas Kárim laıyq dep tanyldy. Kórme sońy án-jyrǵa ulasty. Kórmeden qurqol qaıtqandar joq. Talapkerlerdiń barlyǵyna syı-sııapat tabys etildi. Eń basty olja – ulttyq muranyń ulyqtalyp, qaıta jańǵyrýy boldy.
