Máselen, keıingi kezde Jambyl oblysynda balalardyń bıikten qulaý deregi jıilegen. Tipti ótken jylmen salystyrǵanda óńirde balalardyń bıikten qulaý oqıǵasy 4 paıyzǵa ósken. Osy oraıda, mamandar ata-analarǵa eger bala úıde bolsa, terezeni ashyq qaldyrmaý kerektigin, eger terezeniń tıisti qorǵanyshy bolmasa, jaı tordy senimdi tirek retinde paıdalanbaý qajettigin eskertýde. Eń bastysy, balalardy qaraýsyz qaldyrmaý kerektigi aıtylýda.
Balalarǵa qatysty kez kelgen másele qoǵamdaǵy kúrdeli máselelerdiń biri. Mundaı jaǵdaı kóbinese balalardyń qaraýsyz qalǵanynan bolady eken. Al oblystyq tótenshe jaǵdaılar departamenti tótenshe jaǵdaılardyń aldyn alý basqarmasynyń bastyǵy, azamattyq qorǵaý polkovnıgi Talǵat Aıtbaevtyń aıtýynsha, óńirde jyl basynan beri 14 bala kópqabatty turǵyn úılerden qulaǵan. Olardyń ishinde 2 jastaǵy sábıden bastap, 15 jastaǵy jetkinshekter de bar. Atalǵan tótenshe oqıǵalar kezinde 2 bala kóz jumǵan. Bul kórsetkishtiń ótken jyldyń osy kezeńimen salystyrǵanda 4 paıyzǵa óskenin ańǵarýǵa bolady. Iаǵnı byltyr 9 oqıǵa tirkelip, 6 jastaǵy bir jetkinshek mert bolǵan.
«Balalardyń tereze aldyna shyǵyp ketýine múmkindik týǵyzatyn jıhazdardy ol tustan qashyqqa qoıǵan abzal. Úı ishinde qaýipsizdik sabaqtaryn ótkizý de artyq bolmaıdy. Ásirese, úlkenderimizdiń kishkentaı búldirshinderge qamqor bolýdy úırengeni jón. Balalar terezeni óz betterinshe ashpas úshin terezege bloktaýysh nemese tutqasyna qulyp ornatý kerek», deıdi ol.
Árıne, adam shyǵyny, onyń ishinde bala ólimi árkimge de ońaı tımeıtini anyq. Degenmen, tıisti mamandar qaýipsizdik máselesin qaperde ustaý kerektigin aıtýda. Bul rette tótenshe jaǵdaılar departamenti men aýmaqtyq bólimsheler qyzmetkerleri, jergilikti polısııa qyzmetiniń ókilderi jáne eriktiler birlesip 21 307 turǵyn úıde 53 myńnan astam adamnyń qatysýymen túsindirý jumystaryn júrgizgen. Alaıda qazirgi kezde balalardyń bıikten qulaý deregi azaımaı otyr. Qaıta ýaqyt ótken saıyn kórsetkishter artyp, qaýipti qubylystar jıi oryn alýda. Bul da óz kezeginde ózge ata-analardyń alańdaýshylyǵyn týdyrady.
