Aqmolalyq dıqandar astyqsyz emes

Aldyn-ala jasalǵan esepke qaraǵanda, gektar berekesi 8,6 sentnerden aınalýda. Kóktemniń qamyn kúzde oılaıtyn dıqandar 529,8 myń tonna sapaly tuqymdy qambalaryna quıyp aldy. Bul qajetti kórsetkishtiń 91,6 paıy­zy. Kúzgi dala jumystaryna tııa­naqty daıyndalǵan Esil aýda­ny­nyń dıqandary oblysta egin ora­ǵyn birinshi bolyp aıaqtady. Aýdan ákiminiń orynbasary As­qar­­bek Maqsymhannyń aıtýyna qa­­raǵanda, aýdan dıqandary 438,2 myń gektar alqaptan 306,7 myń tonna altyn astyq jınap alǵan.

– Gektar berekesi 7 sentner­den aınaldy. Bıylǵydaı qýańshylyq jyly táýbe derlik, – deıdi aýdan ákiminiń orynbasary, – kóktemgi egiske qajetti 45,5 myń tonna tuqym tazartylyp, qambaǵa qu­ıyl­dy. Aýdanda «Zarechnyı» jáne «Novo-Prırechnyı» serik­tes­tikteri jaýapty naýqandy alǵash­qylardyń biri bolyp tap-tuınaqtaı etip aıaqtap shyqty. Bul seriktestikterdiń árqaısysy 30 myń gektar alqapqa egilgen dándi jáne burshaq daqyldaryn jınap aldy.

Búginde eńbek maıdanynyń ekpini qyzyl qyrmanǵa aýǵan. Dıqandar dándi daqyldar jınalyp alynǵan alqaptarda jer óńdeý jumystaryn bastap ketti. Bir aıta keterligi, qaýqary mol serik­testikter áleýmettik jaǵy­nan az qamtylǵan otbasylaryn qysqa qajetti mal azyǵymen to­lyq qamtamasyz etti. Bul jumys­qa aýdandaǵy otyzǵa jýyq iri seriktestikter men júzden astam sharýasy shıraq qojalyqtar bir kisideı atsalysqan.

Eren eńbegimen tanylǵan esil­dik­terdiń ókshesin Jarqaıyń, At­basar aýdanynyń dıqandary da basyp keledi. Aıtalyq, jeri qunarly Jarqaıyń aýdanynyń egistik alqaby – 615,7 myń gek­tar. Oblystaǵy eń iri aýdan sana­tynda. Bul aýdanda da eń­bek ekpini ózgelerge úlgi bolar­lyq­taı. Búginge deıin barlyq egis al­qabyndaǵy 588 myń gektar jerdiń ónimi jınalyp, 294 myń tonna astyq qyrmandarǵa jetkizildi. Ma­shına-traktor parkin birshama jańǵyrtý arqyly eńbek ónimdiligi de joǵary. Ashyq kúnderi 20 myń gektarǵa jýyq alqap orylady. Gektar berekesi ortasha eseppen 7,5 sentnerden aınalýda. Kók­temgi egiske qajetti 63 myń tonna tuqymnyń 95,2 paıyzy qambaǵa quıyldy.

Atbasarlyq dıqandar bıyl 373,4 myń gektar jerge dándi da­qyldar tuqymyn sińirgen bo­la­tyn. Kúnniń árbir ashyq sá­tin tıimdi paıdalanǵan aýdan dıqan­dary barlyq alqaptyń 95 paıyzyn jınap aldy. Jerde óngendi jerde qaldyrmaýǵa tyrysqan eń­bekkerler 265,6 myń tonna astyq bastyrdy. Bul aýdanda da gektar berekesi 7,5 sentnerden aınalýda. Qajetti tuqymnyń tolyq qory jasaldy.

Sandyqtaý aýdanynyń dı­qan­­dary qýańshylyq jyl­dyń ózin­de de táp-táýir ónim ósir­di. Aýdan­daǵy 306,4 myń gek­tar al­qapta ósirilgen dándi daqyl­dar­dyń 91,6 paıyzy jınaldy. О́z­ge aýdandarǵa qaraǵanda bıyl Sandyqtaýdyń yrysy birshama mol ekenin aıta ketelik. Gektar berekesi 12,7 sentnerden aınalýda. Aýdandaǵy «Belgradskoe», «USAgro» seriktestikteri men «Lıýbımovy» sharýa qojalyǵy egin oraǵyn erte aıaqtady. Dándi daqyldar alqaptarynyń keı tusyndaǵy túsim de joǵary. Aıta­lyq, «Belgorodskoe» seriktestigi 17,5, «Svobodnoe» seriktestigi 20, «Maksımovka» seriktestigi 21,2 sentnerden ónim jınady.

Kórsetkishterge kóńil aýdar­sańyz, bir alqaptyń jomart, bir al­qaptyń sarań ekendigin baı­qaısyz. Topyraq quramy, tabı­ǵaty birkelki óńirdegi ónim kólemi árqıly. Demek jer de tilin tap­qanǵa ıedi-aý.