Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev bastaǵan jumys toby Almatyda boldy.
Vıse-premer birqatar óndiris oryndaryn aralap, óńirde údemeli ındýstrııalyq-ınnovasııalyq damý baǵdarlamasyn júzege asyrý jáne Almaty qalasynda ınnovasııalyq klasterdi qalyptastyrý máseleleri boıynsha keńes ótkizdi.
Jumys tobynyń sapary Infeksııaǵa qarsy preparattardyń ǵylymı ortalyǵy qyzmetimen tanysýdan bastaldy. Ortalyq ótken jyly qurt aýrýyna qarsy jańa dárilik ónimniń klınıkalyq synaýlarynyń úshinshi kezeńin bastaǵan bolatyn. Indýstrııa jáne jańa tehnologııalar mınıstri aralaǵan ekinshi nysan «Nobel» farmasevtıkalyq fabrıkasy boldy. 2011 jyly Indýstrııalandyrý kartasy aıasynda kompanııa farmasevtıkalyq óndirisin halyqaralyq standarttarǵa sáıkestendirip jańartqan bolatyn. Sonyń arqasynda óndiris qýattylyǵy 50 paıyzǵa artyp, ónim túrleri kóbeıe túsken.
Sondaı-aq, Áset Isekeshev «Rahat» kondıterlik fabrıkasynyń jumysymen de tanysty. О́tken jyly kompanııanyń basshylyǵy aýysyp, kásiporynnyń basqarý tizgini koreıalyq ınvestorlarǵa ótkeni belgili. Vıse-premer óndiris tehnologııasyn óz kózimen kórip, elimizdegi birden-bir brend ónim shyǵaryp otyrǵan kásiporynnyń jumysymen etene tanysty. «Rahat» fabrıkasynyń ónimderi TMD kóleminde de, alys shetelderde de, máselen, Germanııa, Aýǵanstan sekildi elderde de tanymaldyǵy jáne ótimdiligi jaǵynan aldyńǵy lekte.
Budan ózge vıse-premer bastaǵan top ál-Farabı atyndaǵy Qazaq ulttyq ýnıversıtetinde bolyp, ol jerde jas ǵalymdarmen kezdesti. Á.Isekeshev basqosý barysynda Indýstrııa jáne jańa tehnologııalar mınıstrliginiń qatysýymen óńirlerde ınnovasııalyq klasterdi qalyptastyrý isi qolǵa alynǵandyǵyn aıtyp ótti. Tústen keıin qalalyq ákimdikte mınıstrdiń qatysýymen údemeli ındýstrııalyq-ınnovasııalyq damý baǵdarlamasyn júzege asyrý máseleleri boıynsha keńeıtilgen keńes ótti.
Almatylyq bıznes ókilderi qatysqan keńes nátıjesi boıynsha qala ákimi Ahmetjan Esimov pen vıse-premer – Indýstrııa jáne jańa tehnologııalar mınıstri Áset Isekeshev 2014 jylǵa arnalǵan kelisilgen is-áreketter josparyna jáne týrızm salasyndaǵy yntymaqtastyq týraly memorandýmǵa qol qoıdy.
Qanat ESKENDIR,
«Egemen Qazaqstan».
ALMATY.
