Sharaına

ShVEISARIIа MIGRANTTARǴA QARSY

Shveısarııada jeksenbi kúni mıgranttardyń elge kelýin shekteý týraly referendým ótken edi. Nátıjesinde respondentterdiń 50,3 paıyzy shekteýdi jaqtap daýys berdi. Bul – daýystardy sanaýdyń aldyn ala jasalǵan nátıjesi.

Aqparattarǵa qaraǵanda, mıgrant­tardyń kelýin shekteýdi negizinen jergilikti selolardyń turǵyndary qoldaǵan. О́ıtkeni, olar mıgranttardyń kelýi saldarynan baǵa qymbattaıdy, sondaı-aq, budan densaýlyq saqtaý salasy zardap shegedi dep esepteıdi. Referendýmǵa qala turǵyndary qarsy daýys bergen. Osyndaı referendým ótkizý jónindegi bastamany Shveısarııanyń halyq partııasy kótergen bolatyn. Al Eýropalyq Odaqqa Shveısarııa múshe emes ekendigin aıta keteıik.

ÝKRAINALYQQA RESMI AIYP TAǴYLDY

Jetinshi aqpanda Harkovten Ystambulǵa ushyp kele jatqan ushaqty basyp almaq bolǵan Ýkraına azamatyna resmı aıyp taǵyldy. Túrkııa polısııasynyń habarlaýynsha, odan jaýap alynǵannan soń qamaýǵa alynǵan.

Túrkııa eliniń zańnamalary boıynsha, áýe kemesin basyp alýǵa árekettengender keminde 20 jylǵa sottalady. Oqıǵa 7 aqpan kúni keshkisin ushaq bortynda bolǵan edi. Bortynda 110 jolaýshy bar ushaq óz baǵytymen ushyp kele jatqanda, ýkraınalyq mas azamat ózin ushqyshtar kabınasyna kirgizýin jáne áýe kemesin Olımpııa oıyndarynyń ashylý saltanaty ótip jatqan Sochı qalasyna burýyn talap etken ǵoı. Munymen qoımaı ol ushaqty jaramyn dep te qorqytypty. Al ol Harkov qalasynyń 45 jastaǵy turǵyny Artem Kozlov degen bolsa kerek.

BURYNǴY BAS PROKÝRORDY ATYP KETTI

Lıvııanyń burynǵy bas prokýrory Abdelazız al-Hasadı atyp óltirildi. Ol óziniń týǵan qalasy – Dernadaǵy týystaryna kelgen kezde oqqa ushqan. Oǵan jasalǵan qastandyq jaýapkershiligin qazirge eshkim moınyna alǵan joq.

Al-Hasadı 2011 jyly Mýammar Kaddafı bılikten taıdyrylyp, óltirilgen soń, eldiń bas prokýrory qyzmetine otyrǵan edi. 2013 jyly densaýlyq jaǵdaıynyń nasharlaýyna baılanysty bul qyzmetten otstavkaǵa ketken. Lıvııada joǵary laýazymdy sheneýnikterdi óltirý etek alyp bara jatqandaı. Mysaly, osy jyldyń qańtarynda eldiń ishki ister mınıstri men ónerkásip mınıstriniń orynbasaryna qastandyq jasaldy.

QYSQA QAIYRYP AITQANDA:

● Reseılik buqaralyq aqparat quraldary burynǵy qorǵanys mınıstri Anatolıı Serdıýkovqa 2012 jyly Reseı Batyry ataǵynyń berilgenin habarlady. Bul ataq oǵan qupııa jarlyqpen berilse kerek. ● Bosnııa men Gersegovınııa astanasy Saraevoda osynyń aldyndaǵy jappaı qarsylyq aksııasy kezinde ustalǵandardy bosatty. ● Kalıfornııada jol-kólik oqıǵasy kezinde alty adam mert boldy. Apat bir avtokóliktiń qarsy jolǵa shyǵyp ketýinen oryn alǵan.  

QALYŃ QAR ÁBIGERGE SALÝDA

Japonııanyń jergilikti NHK telearnasynyń habarlaýynsha, el aýmaǵyna qalyń qar túsýiniń saldarynan jeti adam qaza taýyp, bir myńǵa jýyq turǵyn túrli jaraqat alǵan. Aqparatqa qaraǵanda, qaza tapqandardyń ólimine jol-kólik oqıǵalary sebep bolǵan.

Zardap shekkenderdiń kópshiligi jaraqattardy muz basqan jaıaý júrginshiler joldarynda taıyp qulaǵannan alǵan kórinedi. Qalyń qardan, sondaı-aq, birqatar prefektýralarda 20 myńnan astam úı elektr jaryǵynsyz qalyp otyr. Bulardan bólek, bılik 300 avıareıstiń ushý ýaqytyn aýystyrýǵa týra kelipti. Bul elde qar ótken sendi kúni jaýa bastaǵan eken. Mundaı qalyń qar Japonııada sońǵy 45 jyldan beri túspepti.

IZDEÝDEGI ESIRTKI BARONY USTALDY

Meksıka polısııasy «esirtki barony» dep aıyptalyp, AQSh bıligi tarapynan izdestirýde júrgen Tırso Sanchesti qolǵa túsirdi. Ol Meksıkanyń Gýanahýato shtatynda ustalǵan.

AQSh-tyń memlekettik depar­tamenti kúdiktiniń turyp jatqan jeri týraly aqparat bergen adamǵa 5 mıllıon dollar berýge ýáde etken kórinedi. Vedomstvo bul qarjyny bergeni jóninde aqparat joq. Al AQSh bıligi Sanches 2000-2003 jyldary aralyǵynda AQSh aýmaǵyna 76 tonna kokaın jetkizýdi uıymdastyrdy degen kúdik keltiredi. Sonymen birge, Sanchesti Kolýmbııa quqyq qorǵaý organdary da izdestirip jatqan eken.

KEMELERIN NE ÚShIN ATTANDYRDY?

Iran úkimeti ózderiniń birneshe áskerı kemesin Atlant muhıtyndaǵy AQSh-tyń teńizdegi shekarasyna attandyrdy. Bul jóninde «Reıter» agenttigi habarlady.

Irannyń soltústik flotyna qolbasshylyq etetin admıral Afshın Rezaı Haddat osy týraly: «Irannyń áskerı floty AQSh-tyń teńizdegi shekarasyna jaqyndap keledi. Bul sharanyń ózindik ereksheligi bar», – dep túsinik bergen eken. Keıbir saıasatkerler muny AQSh áskerı teńiz kúshteriniń Parsy shyǵanaǵyna qatysýyn kúsheıtý dep esepteıdi. Iran taraby qansha áskerı keme jáne qansha adam attandyrǵanyn qupııa saqtap otyr. Aıta keteıik, Bahreınde ornalasqan AQSh-tyń besinshi flotynyń kemeleri qazirgi kezde Parsy shyǵanaǵynda kemelerdiń erkin júrýin qamtamasyz etý úshin turaqty qyzmet etip júr.

Internet materıaldary negizinde ázirlendi.